Itun fiskala ala independentzia aukeratzea eskatu dio PSCk Masi

''Anbiguotasun behin betiko'' albo batera utzi eta, ''argi eta garbi'', itun fiskalaren eta independentziaren artean aukeratu dezan eskatu dio Pere Navarro PSC alderdiko idazkariak Artur Mas Generalitateko presidenteari.

"Gure historian izan den manifestaziorik jendetsuenetako bat izan zen atzokoa, Kataluniako Gobernuak bultzatu eta babestutakoa. Orain erabaki bat hartzera behartuta dago Mas: itun fiskala ala independentzia nahi duen'', esan du Navarrok prentsaurreko batean.

Independentzia defendatzeko prest baldin badago, erronka ere proposatu dio Masi: irailaren bukaeran ERCk Kataluniako Parlamentuan independentziaren alde aurkeztuko duen mozioa babestea.

Kataluniako sozialisten buruaren iritzian, atzoko martxako eskaerarik nagusia independentzia izan zen, baina beste aldarrikapen batzuk ere egon ziren, ''murrizketa sozialen kontrakoak'' eta krisiak piztutako haserreak eragindakoak, besteak beste.