Otxandianok "herri proiektu alternatibo bat" aurkeztuko du inbestidura saioan

Pello Otxandiano EH Bilduren talde parlamentarioko bozeramaileak "herri proiektu alternatibo bat" aurkeztuko du ekainaren 20ko inbestidura saioan, Eusko Legebiltzarrean. Nerea Kortajarena EH Bilduren Legebiltzarreko bozeramaileak gaur goizean Euskadi Irratian aurreratu duenez, Otxandiano lehendakari izateko hautagaitza aurkeztuko du koalizio abertzaleak. 

EH Bilduren Mahai Politikoak apirilaren 21eko hauteskundeetatik igarotako hilabete eta erdiko tartea aztertu zuen atzo, astelehena. Hitzordu hartan, EAJk eta EH Bilduk 27na eserleku lortu zituzten.

EH Bilduren arabera, "hauteskunde-kanpainak agerian utzi zuen, besteak beste, gobernu kolaboratiboak eta gobernantza eredu ez baztertzaileak behar direla Arabak, Bizkaiak eta Gipuzkoak aurre egin behar dieten garaiko herri erronka handiei heltzeko, egungo testuinguru sozial eta ekonomikoan ziurgabetasun handiak daudelako, bai eta pasa den mendeko politika egiteko moduak ere".

Koalizio abertzalearen esanetan, zazpi aste hauetan, "EH Bilduren lehendakarigai Pello Otxandianok helburu bat duten gobernu kolaboratiboen aldeko proposamenari eutsi dio, eta eskua luzatu du hauteskundeen osteko eszenatokiari buruzko analisi politikoa partekatzeko ez ezik, elkarguneak bilatzeko eta horietan sakontzeko ere, betiere herritarren ongizatea lehenetsiz".

Hala ere, EH Bilduk ziurtatu du zazpi aste hauetan jaso duen "erantzun bakarra" bilera horiek "beste baterako uzteko deia" izan dela, Imanol Pradales hautagai jeltzalearen "denbora falta" argudiatuta.

"Seriotasun falta ikusirik, hauteskunde-kanpainan emandako hitza urratzen ari direla ikusirik, jarraitutasun-politika eginez akordio eta gobernu baztertzaileak eraikitzen ari direla ikusirik, eta EH Bilduk eta EAJk eserleku kopuru bera dutela kontuan hartuta, EH Bilduren Mahai Politikoa ondorio argi batera heldu da: egoera honetan ez da aukera bat herri proiektu alternatibo bat ordezkatzen duen hautagaia ez aurkeztea", adierazi du EH Bilduren Mahai Politikoak.

Mahai Politikoaren iritziz, "EAJren eta PSEren jokabideak horren beharra erakusten du. Izan ere, lehendakariaren inbestidura saioa tramite huts bat bailitzan deitu zuten, bera norabidetuko duen proiektu bat ezta oinarri politiko bat ere aurkeztu gabe".

"Hautestontzietan adierazitako herritarren mandatua tramite kosmetiko huts bihurtzea arduragabekeria litzateke, eta EH Bilduk ez du horrelakorik egingo; aitzitik, Araba, Bizkai eta Gipuzkoako egoerari buruzko eztabaida bat sustatuko du", gaineratu du EH Bilduk.