PSN, EH Bildu, Geroa Bai eta Zurekin Nafarroak Gorenaren epaia kritikatu dute; UPNk eta PPNk, aldiz, babestu

UPNk Gorenaren epaia errespetatzen du. Gorenak bertan behera utzi du trafiko eskumena Nafarroako Gobernuaren esku uzteko errege dekretua, JUCIL guardia zibilen elkarteak aurkeztutako helegitea onartuta. Era berean, erregionalistek Maria Chiviteren Gobernuari eskatu diote "bere gain har dezala gertatutakoagatik duen erantzukizuna eta argitu dezala zergatik aukeratu zuen Errege Dekretuaren formula, bai eta epaiaren ondorioak ere".

Prentsa ohar batean, UPNk Nafarroako Gobernuari eskatu dio "legearen barruan ahalik eta ekimen gehien aurrera eraman ditzala Foru Erkidegoak gai horretan dituen eskumenak defendatzeko", eta berretsi du trafikoaren eskumena Nafarroara "legearen arabera" iritsi behar dela eta zerbitzua "Foruzaingoak eta Guardia Zibilak batera eman behar dutela, azken hori Nafarroako errepideetatik ez desagertzeko, alderdi abertzaleek eta independentistek nahi bezala".

Era berean, alderdi erregionalistak "bi gobernuen arteko transferentzia kudeatzeko moduaren aurka" dagoela gogorarazi du, "presak bultzatuta eta PSOEren eta EH Bilduren arteko merkatu gisa, indar abertzaleak Alderdi Sozialistari emandako babesaren truke, eta horrek, ikusi den bezala, ondorio legalak izan ditu".

PSNk iragarri du Trafiko eskumen esklusiboa Nafarroari transferitzea defendatuko duela, Foru Erkidegoaren "eskubide historikoa" dela iritzita.

Nafarroak Trafiko eskumena izatea "eragozten" duten testu juridikoak berrikusteke dauden arren, PSNk ohar batean adierazi du sozialistek "Nafarroako legea defendatuko" dutela, eta horretarako adierazpen instituzional bat aurkeztuko dutela Parlamentuan, transferentzia eskubide historiko gisa defendatzeko.

"Nafarroari trafikoa transferitzeko prozesuan parte hartu duten indar guztiek Nafarroako eskubide historikoek 'Lorafna'n eta Konstituzioan ezartzen dutena errespetatzen duten erabaki beharko dute", azpimarratu du PSNk.

Nafarroako sozialistek gogorarazi dute trafikoaren arloko eskumenak bere gain hartzeak ez duela esan nahi "inor baztertzea", eta Nafarroan lan egiten duten "segurtasun indar guztien lanarekiko errespetua" berretsi du.

Laura Aznal EH Bilduko bozeramailea. Irudia: EITB

EH Bilduren ustez, Gorenaren erabakia "Nafarroaren foraltasunaren eta subiranotasunaren aurkako eraso juridiko larria da".

"Gure errepideen kudeaketa Nafarroako eskumen historikoa da, eta frankismoan kendu ziguten", gogorarazi du Laura Aznal Nafarroako Parlamentuko bozeramaileak.

"Orain, gehiengoaren borondate politiko bati esker lortu dugu eskumena, eta Espainiako auzitegi batek eragotzi egiten du eskumen hori gauzatzea, Guardia Zibilaren elkarte baten ekimenez", salatu du.

Geroa Baik beharrezko prozedura abian jartzeko eskatu die Nafarroako eta Espainiako gobernuei, "ahal izanez gero, auzitegiaren epaia iraultzeko". "Oso larria da, formazko argudio batekin, mamiaren errealitatea ukatzen ari dira, eskubide historikoen errealitatea", adierazi du Uxue Barkos koalizioko bozeramaileak.

Hori dela eta, "ez gatoz bat, inondik inora, Gorenaren irakurketarekin, errege-dekretuaren erabilera zalantzan jartzen baitu, hori da bideetako bat, eta ez litzateke oztopo izango, eskubide historikoen errealitatea zalantzan jartzen ez bada behintzat", gaineratu du Barkosek.

Zurekin Nafarroak "oinarri politiko argia" ikusten du epaiaren atzean, eta "foru-autogobernua eta 1960ra arte Nafarroak izan zuen eskumenaren titulartasuna bera gutxiesten dituela, Espainiako Konstituzioaz gain; izan ere, Konstituzioaren lehen xedapen gehigarriak foru-lurraldeen eskubide historikoak babesten, errespetatzen eta aitortzen ditu, eta xedapen hori nahikoa da transferentzia bat egiteko, Gorenak bere epaian adierazten duenaren aurka".

Ezkerreko koalizioaren ustez, "harrigarria da Auzitegi Gorenak bere aurreko jurisprudentzia bera kolokan jartzea, 2018ko bi epairi buruz eta Auzitegi Konstituzionalaren doktrinak – Konstituzioaren lehen xedapen gehigarriaren gainean oinarritua – babesten dituen hainbat epairi buruz".

"Zurekin Nafarroatik egin daitekeen irakurketa bakarra da presio politikoak berriro sartu direla magistratuen bulegoetan, Estatu osoan piztu zen kanpaina faltsuaren ondorioz", erantsi dutenez.

Aitzitik, Nafarroako Alderdi Popularrak (PPN) gogorarazi duenez, "Trafikoaren erabateko esklusibotasunaren transferentziak Foru Hobekuntzaren Legea aldatzea ekarriko lukeela ohartarazi genuen".

Javier Garcia PPNko presidenteak ohar batean esan duenez, "Nafarroaren eta Espainiako Gobernuaren artean NFEBHLO edo 'Lorafna' aldatzeko hitzarmenik ez badago, ezin da adostu Guardia Zibilari trafikoaren arloan orain betetzen dituen funtzioak kentzea". "Eta hori Lege Organiko baten bidez bakarrik egin daiteke, ez Errege Dekretu bidez. Zuzenbidean formak mamia bezain garrantzitsuak dira", azaldu dute PPNtik.