"Euskara eta gazteleraren arteko desoreka tratatzeko sentsibilitate falta" egotzi dio Urkulluk justiziari

Iñigo Urkullu lehendakariak "sentsibilitate falta handia" leporatu dio arlo judizialari "euskararen eta gazteleraren artean dagoen desoreka" tratatzeko orduan, EAEko Auzitegi Nagusiak euskararen kontra emandako bi epaien harira (azkena, atzo bertan). Horren ildotik, iragarri du bien kontrako helegitea aurkeztuko dutela Jaurlaritza horiekin konforme ez dagoelako. 

Lehendakariak horrela erantzun dio Eusko Legebiltzarreko kontrolerako saioan Amaia Martinez Voxeko legebiltzarkideari egindako galderari. Martinezek itauna egin dio jakin nahian noiz aplikatuko dituen Jaurlaritzak EAEko Auzitegi Nagusiak udal legearen eta arautzen duen dekretuaren inguruan ebatzitakoak. 

Urkulluk gogorarazi duenez, euskara hutsean egindako ihardespenean, epaia ez da irmoa eta Eusko Jaurlaritzak Auzitegi Gorenera joko du. Ondoren, gaztelera erabilita, salatu du Voxek "politikoki konpondutako auzia judizializatu" duela —udal legea babes handiarekin onartu zuten Legebiltzarrean—, eta azpimarratu du hizkuntza eskubideak bermatzea botere publikoen egitekoa dela, baita botere judizialarena ere.  

Lehendakariaren aburuz, "euskara eta gaztelania urrun daude berdintasun egoera batean egotetik, eta asko dago egiteko. Arlo judizialean ere desoreka nabarmena dago, eta sentsibilitate handia falta da gai hauek tratatzeko orduan".

Halaber, azpimarratu du Auzitegi Konstituzionalak tokiko erakundeen legearen artikulu bakarra (6.2 artikulua) baliogabetu zuela bakarrik; hortaz, arauaren gainerako artikuluak Konstituzioaren araberakoak dira. Urkulluren esanetan, "harrigarria" da EAEko Auzitegi Nagusia "Auzitegi Konstituzionala bera baino urrunago joan izana". Era berean, PPren helegitea hartu du hizpide (horrek eragin du atzo Auzitegiak emandako epaia), eta gogora ekarri du Mariano Rajoyren Gobernuak berak izenpetu zuela, 2017an, udal legearen inguruan aldebiko batzordean lortutako akordioa. "Deigarria da orain errekurtsoa aurkeztea", erantsi du. 

Euskararen kontrako "oldarraldi atzerakoi, gorrotozale eta ezjakina" salatu du EH Bilduk

EH Bilduk gai beraren inguruan egindako beste galdera parlamentario batean, Jasone Agirre legebiltzarkideak "indarrak batu" eta euskararen kontrako "oldarraldiari" erantzuteko deia egin du. Aldarrikatu duenez, euskara gaztelera bezain hizkuntza ofiziala da, eta, beraz, Agirreren esanetan, "ezin digute beste hizkuntza politika bat inposatu, euskara gurea delako eta nazio bat garelako". EH Bilduko kideak salatu duenez, epai horiek "ez dira kasu isolatuak, ondo antolatutako oldarraldi atzerakoi, eskuin muturreko, gorrotozale eta ezjakina da".

Erantzunean, Bingen Zupiria Kultura eta Hizkuntza Politikako sailburuak argi utzi du Jaurlaritzak "ahalik eta instantzia gehienetan" egingo diela aurre euskararen kontrako epai "kezkagarri" horiei. Jaurlaritzako eleduna ere badenaren arabera, sententziok "auzitan" jarri dute euskararen ofizialtasuna eta Euskadiko autogobernurako gaitasuna bera. 

Epaitegietan helegitea aurkezteaz gain, Jaurlaritza prest dago legearen baitan "egin beharreko aldaketa guztiak" egiteko, baita Estatu mailan ere.

3:00

Jaurlaritzak ''ahalik eta instantzia gehienetan'' egingo die aurre euskararen ofizialtasuna aurkako epaiei