Politika
Inbestidura saioa
Feijook Kongresuaren lehen ezezkoa jaso du
EITB MEDIA
PPren hautagaiak ez du lortu inbestidura lehen saioan, eta 48 orduen buruan berriz ere egingo dute bozketa.
-
Alberto Nuñez Feijoo, bozketaren ondoren. Argazkia: EFE
Alberto Nuñez Feijoo PPko hautagaiaren inbestiduraren bigarren saioa hartu du gaur Espainiako Diputatuen Kongresuak. PPren hautagaiak ez du lortu inbestidura lehen saioan, eta 48 orduen buruan berriz ere egingo dute bozketa.
Horrela, ez da ezustekorik izan eta aurreikusitako gidoia bete da. 178 diputatuk Feijooren inbestiduraren aurka bozkatu dute, eta 172k alde, PP, Vox, UPN eta CCko ordezkariek.
Hala ere, Herminio Rufino Sancho diputatu sozialista bere bozketan erratu denean gertatu da bozketaren anekdota. PSOEko ordezkariak baiezko botoa eman du, baina jarraian zuzenketa onartu da. Kongresuko Mahaiko idazkariak ere huts egin du haren abizena esatean, eta horrek bere nahasmena bultzatu ahal izan du botoa ematerakoan.
Mertxe Aizpurua EH Bilduren eledunaren adierazpenekin hasi da saioa. Diputatu abertzaleak nabarmendu du "ezezko biribila" emango diotela Feijoori, eta haren inbestidura saiakera "antzerkia" dela deitoratu du. Gainera, legegintzaldi berrian "agenda plurinazionala" gailenduko dela adierazi du.
EH Bilduk Kongresuan duen bozeramaileak "maila emateko" eta "politika handia egiteko" deia egin die PSOEko diputatuei, Pedro Sanchez Espainiako jarduneko presidenteak boterean jarraitu eta "agenda plurinazionala eta soziala" aurrera eraman ahal izan dezan.
Feijook, ostera, defendatu du EH Bilduren inguruan "babes-hesi" bat egin beharko luketela "ETAren terrorismoagatik", eta indar horri esan dio biktimei barkamena eskatzeko.
PPko presidenteak EH Bilduren bozeramaileari erantzun dio ez duela "inolako baliorik" esaten duenak, "ETAren biktima guztiei benetako barkamena" eskatu ez badie, eta Justiziarekin elkarlanean aritu ez bada argitu gabe dauden 350 hilketak argitzeko. "Bilduren botoak Sanchez jaunari utzi dizkiote, nik ez ditut nahi", azpimarratu du Feijook.
Aitor Esteban EAJko bozeramaileak hartu du hitza, eta esan du aukerak "Feijoo edo amnistia" badira, bigarrenaren alde egingo dutela. Era berean, ohartarazi du ez dutela parte hartuko Vox tartean dagoen edozein batuketatan.
Kongresuko bozeramaile jeltzaleak Feijooren inbestidurari ezetz esan dio, funtsezko bi arrazoirengatik: Voxen botoak ezinbestekoak direlako hori lortzeko, eta bere proposamen bakarra "konfrontazioan" eta "bide judizialean" sakontzea dela, Zigor Kodearen erreforma gehiagorekin. "Sua piztea proposatzen duzue", laburbildu du.
"Ezin du esan Vox ez dagoela inbestiduraren ekuazioan. Igerilekuan ezkutatu ezinezko tamaina duen balea bat dago", adierazi du, eta Voxen babesarekin jaiotako legealdi bat" kudeatzea ezinezkoa "izango litzatekeela ohartarazi du.
Ifrentzuan, oso bestelako hitzaldia egin du Alberto Catalan UPNko diputatuak. Ohartarazi duenez, "ezin gara Espainia suntsitu nahi dutenen xantaiapean egon" eta, horren aurrean, Feijook "aldaketa" ekarriko duela defendatu du.
Catalanek Nafarroaren foru izaera defendatu du, eta jomugan izan ditu EH Bildu eta Kataluniako indenpendentistak. Lehenengoak "ETAren oinordekoak" direla uste du eta Sanchezen "zuritze ariketa" salatu. Junts eta ERCren harira adierazi duenez, "ezin da iheslariekin negoziatu ezta amnistia ilegalak itundu ere".
Dudarik gabe, Pedro Sanchez Espainiako Gobernuko jarduneko presidentearen isiltasuna izan zen atzoko protagonistetako bat. Sozialisten buruak ez zuen parte hartu saioan, eta Oscar Puente diputatuak (Valladolideko alkate ohia) hitz egin zuen haren ordez PSOEren izenean, guztien harridurarako. Keinu horrek PPren haserrea eragin zuen, eta "koldarra, koldarra" oihukatuz erantzun zuten diputatu popularrek.
Atzo goizean egin zuen inbestidura hitzaldian, Feijook sei akordio handi ixtea eskaini zien Kongresuko diputatuei, PPren bakarkako Exekutiboarekin, baina ez "bakardadean", baizik eta Behe Ganberaren "lan kolektiboarekin".
