Gasteiz eta Iruñea ezin izan ditu lortu EH Bilduk baina Tolosa, Arrasate eta Andoain berreskuratu ditu

Udalen osaketa eguna iritsita, argitu dira azken egunotako zalantzak eta aginte makila hartu dute alkate berriek. EH Bilduk ez ditu Gasteiz eta Iruñea eskuratu, azkenean, baina Euskal Herriko udal garrantzitsu asko geratu dira koalizio independentistaren esku, zerrenda bozkatuena izateagatik kasu batzutan eta Elkarrekin Podemosen zein tokian tokiko plataforma independenteen babesarekin beste batzuetan.

Araban, Laudioko alkatetza berreskuratu du EH Bilduk, Omnia herri plataformaren babesari esker. Zazpi zinegotzi zituen EH Bilduk eta sei EAJk. PSEk zinegotzi bat du eta Omniak hiru eta horiek EH Bilduren alde bozkatuta, Ainize Gastaka izango da alkate.

Aiara ere EH Bilduk gobernatuko du datozen lau urteetan, Aiara Batuz auzo plataformari esker. Maiatzaren 28ko hauteskundeetan EAJk 5 zinegotzi lortu zituen, Aiara Batuz plataformak 3 eta EH Bilduk beste hiru.  Plataformak Pruden Otegi EH Bilduren hautagaia babestu du larunbat honetan.

Oionen ere sorpresa izan da eta EH Bildu izango da alkatetzan. Lehen indarra izan zen hauteskundeetan baina EAJk ken ziezaiokeen aginte makila PSEren eta PPren babesarekin, baina EAJk hautagaitzarik ez aurkeztea erabaki du.

Koalizio abertzalearen esku geratu dira Agurain, Dulantzi, Artziniega, Samaniego, Zuia, Lagran, Donemiliaga eta Urkabustaiz ere, besteak beste.

01:27

Araba: 51 udaletako alkateek jaso dute gaur aginte makila

Bizkaian, Bermeo berreskuratu du EH Bilduk Guzan herri plataformaren babesari esker: 9 boto lortu ditu EH Bilduk eta 8, berriz, EAJk. Asier Larrauri da alkate gaurtik aurrera.

Mundakan sorpresa izan da eta EH Bilduk lortu du alkatetza 44 urtean lehen aldiz, herri plataformaren babesari esker. Sorne Rubio Mundakako EH Bilduren hautagaia izendatu dute alkate, Mikel Bilbao EAJko alkate ohiak gidatutako plataformak hura babestu eta gero. Duela lau urte, Mikel Bilbaok Mundakako Udaleko aginte-makila lortu zuen EAJren hautagai gisa, baina alderdiarekin izandako desadostasunengatik zentsura-mozioa aurkeztu zioten, eta 2021eko urrian kargugabetu egin zuten. Orain. bere talde independenteak EH Bilduko hautagai babestu du.

Aldaketekin jarraituz, Abadiño ere EH Bilduk eskuratu du, koalizio subiranistaren eta zinegotzi independenteen arteko itunari esker. Era berean, EH Bilduko zinegotziei esker, Gorliz eta Zallan plataformak independenteek gobernatuko dute, EAJren ordez.

Urduliz eta Sopela ere EH Bilduk eskuratu ditu, Podemosen babesarekin lehen kasuan eta zerrenda bozkatuena izateagatik bigarrenean. Alonsotegi, Iñigo Urkulluren jaioterria ere EH Bilduren esku geratu da oraingoan, zerrenda bozkatuena izateagatik, beti EAJren esku egon den arren.

Galdakaon, Ondarroan, Lekeition, Bakion zein Elorrion... EH Bilduko alkateek jarraituko dute hurrengo legegintzaldian ere.

01:16

Bizkaia: hainbat udalerritan, EH Bildu eta herri plataformak elkartu dira aginte makila eskuratzeko

Gipuzkoan azken legegintzaldian galdutako hainbat udalerri berreskuratu ditu koalizio independentistak, Tolosa, adibidez, gehiengo osoarekin.

Andoainen eta Pasaian ere agintera itzuli da EH Bildu, Elkarrekin Podemosen babesarekin. Hala, Teo Alberrori pasa dio lekukoa Izaskun Gomezek Pasaian. Zerrenda bozkatuena izanik eta Elkarrekin Podemosen babesari esker, Arrasaten, Errenterian eta Ordizian ere aginduko du koalizio independentistak.

Maider Morras Arrasateko alkate!
Alkate onena herria delako, guztiona den etxe hau haize berrituko dugu, leihoak ireki eta zubiak eraiki.

Gaur hasten da elkarlanaren eta herrigintzaren Arrasate. #EgingoDugu #BiziArrasate ¿ pic.twitter.com/RLHbvi5e9R

— EH Bildu Arrasate (@ehbilduarrasate) June 17, 2023

Aitzitik, Deban alderantzizkoa gertatu da, Elkarrekin Podemoseko ordezkariak EAJrekin batu dira EH Bilduri alkatetza kentzeko.

Azpeitiak, Amezketak, Astigarragak, Hernanik, Ibarrak, Idiazabalek, Lezok, Mutrikuk, Oiartzunek, Oñatik, Oriok, Usurbilek, Zestoak eta Zumaiak ere, besteak beste, EH Bilduren esku jarraituko dute.

01:08

Gipuzkoa: EH Bilduk ez du Alkatetzarik galdu eta hainbat udalerri berreskuratu ditu

EH Bilduk ohar baten bidez jakinarazi duenez, 145 alkatetza lortu ditu, aurreko legegintzaldian baino 21 gehiago. Hori dela eta, "EH Bildu Hego Euskal Herriko lehen indar munizipalista" dela adierazi dute: 15 alkatetza Araban, 41 Bizkaian, 51 Gipuzkoan eta 38 Nafarroan.