Espainiak helegitea aurkeztuko du, Estrasburgoko ebazpenaren aurka

Espainiako Gobernuak helegitea aurkeztuko du Parot doktrina-ren inguruan Europako Giza Eskubideen Auzitegiak emandako ebazpenaren aurka, gaur Jorge Fernandez Diaz Barne ministroak iragarri duenez. Horrez gain, ez du Ines del Rio Prada ETAko kidea aske utziko, ihes egiteko arriskua argudiatuz.

Europako Giza Eskubideen Auzitegia, Estrasburgokoa, Parot doktrinaren kontra agertu da, Ines del Rio Prada ETAko kidearen zigorra berrikusita kartzelan mantentzea "irregularra" delakoan.

Ebazpena ETAk Miguel Angel Blanco Ermuko PPko zinegotzia bahitu zuenetik 15 urte bete diren egun berean iragartzea kritikatu du Barne ministroak. "Lotsagarria da", esan du.

Terrorismoaren biktimen inguruko hitzaldi batean adierazi duenez, ebazpena bertan behera uzteko eskatuko dio Estrasburgoko Auzitegiari, Ines del Riok ihes egiteko duen arriskua argudiatuz.

Horrez gain, Estrasburgoko ebazpenak ezarritako 30.000 euroko isuna ere ez diote Ines del Rio ETAko kideari ordainduko. Auzitegiek Estrasburgori arrazoia ematekotan, Del Riori 30.000 euro horiek "zor duen erantzukizun zibiletik deskontatuko" dizkiote. Ines del Riori 20 hilketa leporatu zizkioten.

Bestalde, Fernandez Diazek ukatu egin du Estrasburgoko Auzitegiak Parot doktrinaren aurkako ebazpenik eman izana: kasu bakar bati buruzko erabakia izan da, Ines del Rio ETAko presoaren ingurukoa, hain zuzen..

"Estrasburgoko Auzitegiak ez du eskumenik Parot doktrinari buruzko ebazpena emateko", azaldu du, eta martxoan Auzitegi Konstituzionalak horren aldeko epaia eman zuela nabarmendu du.