Eskuinaren zatiketak kalte egingo lioke UPNri Iruñean, eta baliteke EH Bilduk zinegotzi kopuru bera lortzea

UPN izango litzateke alderdi bozkatuena Iruñeko udal hauteskundeetan, baina horren boto aurreikuspenak nabarmen egin du behera azken bi hilabeteetan, eta baliteke EH Bilduk zinegotzi kopuru bera lortzea, EITB Focus makroinkestaren arabera. Hori horrela, PSNk erabakiko luke berriz hurrengo alkatea nor izango den, 2019an bezala.

Hain zuzen ere, UPNk 7-8 zinegotzi eta botoen % 27,6 lortuko lituzke, eta 10 ordezkari eta bozen % 31,4 lortzea zen aurreikuspena martxoan publikatutako inkestan.

2019an, Crisitina Ibarrolaren alderdia koalizioan aurkeztu zen hauteskundeetara, PPNrekin eta Ciudadanosekin batera, eta 13 zinegotzi eta botoen % 40,6 eskuratu zituzten elkarrekin.

EITB FOCUS

EH Bilduk, bere aldetik, errepikatu egingo lituzke duela lau urteko emaitzak (7 ordezkari eta % 24,8ko babesa), eta puntu erdiko hazkundea izango luke martxotik.

Hirugarren lekuan, PSN egongo litzateke. Bi hilabetean, ia bi puntuko babesa berreskuratuko luke, eta 4-5 zinegotzi izango lituzke. Egun, 5 ditu.

Geroa Baik 2-3 zinegotzi izango lituzke, eta, horrenbestez, baliteke egungo ordezkaritza (2) areagotzea.

PPNk aurreikuspen berdina izango luke, 2-3 ordezkari, eta Zurekin Nafarroa 1-2 zinegotzirekin sartuko litzateke Udalean.

EITB FOCUS

PSNk izango luke giltza

EITB Focus inkestaren arabera, 2019an gertatutakoa jazoko litzateke berriz Nafarroako hiriburuan.

Horren haritik, ekainaren 17ko inbestidura saioan, Joseba Asironek (EH Bildu) PSNren aldeko botoa beharko luke berriz alkate izateko.

Sozialistek euren hautagaia babestuko balute, ordea, Cristina Ibarrola (UPN) izango litzateke Enrique Maya egungo alkatearen hurrengoa.

Metodologia

Iruñean, 697 pertsona elkarrizketatu dituzte maiatzaren 28ko udal hauteskundeetarako EITB Focus berezia egiteko.

Akats-maila % 4koa da, eta konfiantza-maila, % 95,5ekoa.

Elkarrizketak maiatzaren 3a eta 11 bitartean egin zituzten.

PDF: EITB FOCUS inkesta, EAEko udalerrietako boto-asmoari buruzkoa

PDF: EITB FOCUS inkesta, Iruñeko boto-asmoari buruzkoa