Maiatzaren 28ko hauteskundeetarako posta bidezko botoa eskatzeko azken eguna da gaur

Gaur, maiatzak 18, hilaren 28ko udal- eta foru-hauteskundeetarako posta bidezko botoa eskatzeko azken eguna da. Beraz, Espainiako Estatuan bizi diren eta aurrez aurre bozkatzera joan ezin diren pertsona guztiek gaur arte dute eskatzeko, dagoeneko egin ez badute.

Posta bidezko botoa eskatzeko, beharrezkoa da nortasun agiri ofiziala aurkeztea eta Correosen bulegoetan edo INEren (Estatistikako Institutu Nazionala) webgunean ematen den inprimaki ofiziala betetzea. Hala, posta bidezko botoa eskatu dutenek maiatzaren 21a baino lehen jasoko dute botoa emateko behar duten dokumentazioa.

Botoa bidaltzeko epea maiatzaren 24an amaituko da. Horretarako, hautesleek gutun-azal batean sartu beharko dituzte aukeratutako boto-txartela eta hautesle-erroldako inskripzio-ziurtagiria, eta posta ziurtatuz bidali dagokien hauteskunde-mahaira.