Auzitegi Nazionalak berriz ireki du GALen azken hilketaren kasua

Auzitegi Nazionalak 1987an hil zuten Juan Carlos Garcia Goenaren kasua (GALen azken atentatua) berriz irekitzea erabaki du. Erabakia Pablo Ruz Auzitegi Nazionaleko epaileak hartu du, Fiskaltzak eskatuta, El Mundo egunkariak argitaratu duenez. 2011n, Baltasar Garzonek kasua behin-behinean amaitutzat jotzea erabaki zuen.

Orain, 1987ko uztailaren 24an bonba-auto bat jarrita Garcia Goena hiltzeko egin zuten atentatuaren egile intelektualak eta materialak topatu nahi ditu Pablo Ruz Auzitegi Nazionaleko magistratuak. Biktimak ez zuen ETArekin harremanik, eta erbesteratutako kontzientzia-eragozlea zen.

Lehen neurri bezala, epaileak Poliziaren Zuzendaritza Nagusiari atentatuari buruzko txostena eskatu dio, eta, laister, alargunari deituko dio. Garcia Goenari buruz argitaratu den material fotografikoa eta GALek eskuratu zuen biktimaren argazkiaren egilea non dagoen jakin nahi du. GALeko hiltzaileek Garcia Goena identifikatzeko 1985. urteko Gabonetan biktimak familiarekin batera atera zuen argazki bat erabili zutela jakin ostean, Laura Martin alargunak berak eskatu zuen kasua berriro irekitzea. Argazkia Hendaian atera zuten, eta argazkilariak bi atera bazituen ere, familiak bakarra jaso zuen eta bestea GALen eskuetara iritsi zen.

Informazio horrekin, Auzitegi Nazionalak kasua berriz irekitzea erabaki du; izan ere, kasua preskribatu ez dela uste du. Jose Amedo komisariorde ohiak eta Michel Dominguez lankideak kasu honengatik epaitu zituzten, baina, azkenean, absolbitu egin zituzten.