Taldeen erreakzioak, Sanchez eta Robles ere Pegasusekin zelatatu zituztela iragarri ostean

Pedro Sanchez Espainiako Gobernuko presidentearen eta Margarita Robles Defentsa ministroaren telefonoak Pegasus softwarearekin kutsatu zituztela iragarri du gaur, ezustean, Felix Bolaños Presidentetza, Gorteekiko Harreman eta Memoria Demokratikoko ministroak. Iragarpena egin eta gutxira hasi dira alderdi politikoen buruzagiak horren inguruko iritziak ematen.

EH Bildu

Jon Iñarritu EH Bilduko diputatu eta Pegasusekin zelatatutako buruzagi abertzaleak uste du Espainiako Gobernuak egindako iragarpena "ke-pantaila" bat dela eta espioitza kasu guztiei "irmotasun berarekin" erantzuteko eskatu dio Espainiako Gobernuari, "kasu guztiak baitira larriak", arrazoitu du Twitterren argitaratu duen mezu batean.  

Si lo sabían desde hace meses y lo hacen público ahora convendremos que es una cortina de humo, ¿no?

¿Por qué el Gobierno no actúa con la misma contundencia con el espionaje masivo a decenas de independentistas? ¿En ese caso no es un ataque externo?

Todos son igual de graves. https://t.co/XgJvwtwt3D

— Jon Inarritu (@JonInarritu) May 2, 2022

Oskar Matute koalizio subiranistaren diputatuak ikerketa galdegin du: "Hau guztia Estatuko estolden parte ez dela argitu behar da". Matuteren iritzian, "bada gauza bat zalantzazkoa dena: orain arte esan digutenagatik, Pegasus programa estatuei bakarrik saltzen diete eta oraingoan iradoki digute kanpoko erakunde bat dagoela".

EAJ

Aitor Esteban EAJk Kongresuan dun bozeramailearen aburuz, beharrezkoa da "ikertzea noraino heldu den kontrolik eza". Azpimarratu duenez, "orain bai, ikerketa batzordea osatu behar da Kongresuan", hartara, "arduradunak nortzuk diren zehaztu eta eskatu beharreko dimisioak eskatu" ahalko dira.

"Denbora generaman ohartaraziz inork ezin zuela segurtasunez esan zelatatua egon ez zenik. Espioitzaren ingurumaria guztiak argitu behar zirela azpimarratu genuen hainbat aldiz. Eta, hara non, orain jakin dugu Gobernuko presidentea eta ministro bat ere zelatatu dituztela", adierazi du. 

ERC

Espioitza politikoaren aurrean Espainiako Gobernuak darabilen "neurri bikoitza" kritikatu du Pere Aragones Kataluniako Gobernuko presidenteak txio batean: "Espioitza masiboa Kataluniako erakundeen, alderdien eta eragileen kontrakoa denean, isiltasuna eta aitzakiak. Gaur, dena da presa. Erantzukizunak ja hartu behar dituzte euren gain".

Bien bitartean, Oriol Junqueras ERCko presidenteak buruzagi katalanei egindako espioitza ikertzea eskatu du, "balizko koartadak gorabehera". Txio batean, honakoa erantsi du Junquerasek: "Demokraziaren izenean, gertakari guztiak argitzeko erabateko gardentasuna behar da".

És evident que l'estat espanyol ha dut a terme un espionatge massiu i il·legal sobre tot el moviment independentista. Per això, i lluny de possibles coartades, exigim responsabilitats polítiques. I pel bé de la democràcia, cal la màxima transparència per esclarir tots els fets.

— Oriol Junqueras ¿¿ (@junqueras) May 2, 2022

Ironikoago mintzatu da Marta Rovira alderdiko idazkari nagusia, hori ere Twitterren: "Moncloak dio Moncloa zelatatu dutela Moncloak duen Pegasus programarekin. Orain, erantzukizun politikoak ez ditu Moncloak hartuko".

Junts

Laura Borràs Junts alderdiko kide eta Kataluniako Parlamentuko presidentea zalantzati agertu da, uste baitu Pedro Sanchezen Gobernuaren "amarrua" izan daitekeela espioitza politikoaren "borrero izatetik biktima izatera igarotzeko". "Sanchez eta Robles zelatatuak izan direla diote. Orain bai, larria da auzia. Independentismoari bakarrik eragiten zionean, ministroak justifikatu egiten zuen. Erabilgarriak izateko, estoldak ez direla garbitu behar esatea agerian uzteko ala amarrua al da borrero izatetik biktima izatera pasatzeko? Bye CatalanGate? Ez diguzue ziria sartuko", esan du Borrasek.

Sánchez i Robles diuen ser espiats. Ara sí que és un tema molt greu, quan només afectava l'independentisme, la ministra ho justificava.És l'evidència que no cal netejar les clavegueres per si les pots usar? O una maniobra per passar de botxins a víctimes? Bye CatalanGate? No cola

— Laura Borràs ¿ (@LauraBorras) May 2, 2022

CUP

Albert Botran CUPek Kongresuan duen diputatuak ere galdera bota du: "Borreroak biktima bihurtzeko ke-pantaila? Atentzioa nazioartera bideratzeko saiakera? Edo CNI bera 'Espainiako batasunaren alde' zelatatzen? Nolanahi ere, premiazko ikerketa batzorde bat behar da gertakari guztiak argitzeko".

Cortina de fum per convertir botxins en víctimes? Desviar l’atenció cap a l’estranger? O bé el propi CNI espiant “per la unitat d’Espanya”? En qualsevol cas: cal una comissió d’investigació urgent per esclarir tots els fets.#CatalanGate

— Albert Botran Pahissa (@albertbotran) May 2, 2022

Eusko Jaurlaritza

Galdetu dioten arren, Iñigo Urkullu lehendakariak ez du Pegasusekin egindako zelatatzeen inguruko iritzirik eman nahi izan. "Ez, grabatzen ari dira eta", bota du ironiaz.

Unidas Podemos

Espainiako Gobernuko bazkide eta koalizio morearen izenean, Yolanda Diaz bigarren presidenteorde eta Lan ministroarentzat "ezinbestekoa" da Pegasus auzia "azkeneraino" ikertzea eta "erantzukizunak modu eraginkorrean eta azkar argitzea".

Ildo beretik mintzatu da Ione Belarra koalizioaren idazkari nagusi eta Eskubide Sozial eta 2030 Agendako ministroa ere. "Gure demokrazia eta herritarren konfiantza jokoan daude, erantzukizunak argitu behar dira. Espioitza Estatuaren segurtasunean egindako arrakala sakona da, datorren tokitik datorrela, onartezina da", esan du.

PP

Alberto Nuñez Feijoo Alderdi Popularreko buruzagia "harrituta" azaldu da Bolañosek egindako iragarpenarekin. Dena dela, Espainiako Gobernuari "erabateko babesa" azaldu dio eta segurtasun neurriak "bereziki zaintzeko" eskatu du. Hori gorabehera, ohartarazpena egin dio Sanchezi: ez du PPren babesa izango Espainiaren batasunaren alde ez dauden taldeak sekretu ofizialen batzordean parte hartzeko.

Ciudadanos

Begoña Villacis Madrilgo alkateorde eta Ciudadanoseko zuzendaritzako kidearentzat "kasualitate handia" da Sanchez eta Robles zelatatuak izan zirela orain jakin izana: "Buruzagi independentistak zelatatu dituztela jakin denean, berehala jakinarazi da Sanchez presidenteari ere zelatan ibili zaizkiola". Era berean, Edmundo Bal Cs-k Kongresuan duen bozeramaileak iragarri du taldeak galdera sorta egingo duela bihar Kongresuan auzi horren inguruan. 

Vox

Azkenik, Rocio Monasterio Madrilgo Erkidegoan alderdi ultraeskuindarrak duen bozeramaileak Sanchezi eta Roblesi egindako espioitza "argitzeko" eskatu du, baina deitoratu du auzi horrengatik "Kataluniako kolpisten biktimismoari" kasu egiten ari zaiola.