Gerra lehertu da Casadoren eta Ayusoren artean, ustelkeria eta espioitza akusazio artean

PPren krisiak ez du atzera bueltarik, Pablo Casadoren eta Isabel Diaz Ayusoren arteko talka gerra bilakatu ondoren: Madrilgo presidentearen anaiak kontratu publikoen truke komisioak kobratu ote zituen ikertzen ari da PP, eta Ayusok berak alderdiko Zuzendaritza Nazionalari politikoki "suntsitzeko" egitasmoa aurrera eramatea leporatu dio.

Lurrikararen epizentroan Madrilgo PPren kongresua eta alderdiaren kontrola bereganatzeko borroka daude.

Hiru gertakarik gerra behin betiko hauspotu dute eskuineko alderdian:

Ustezko espioitza jakitera eman dute

Bart, PPk Madrilgo Udalaren bidez Ayusoren aurka abiatutako ustezko espioitzaren berri eman zuten Espainiako komunikabideek. Goizean, Jose Luis Martinez-Almeida alkateak espioitza ukatu eta Ayusoren anaiaren ustezko irregulartasunen frogarik aurkitu ez dutela ziurtatu du.

Ordu batzuk beranduago, Angel Carromero Madrilgo PPren goi-kargudunak dimisioa eman du Alkatetzako Koordinazio idazkari nagusi bezala. Hala ere, ustezko espioitzan parte hartu izana ukatu du Carromerok EFE albiste-agentzian. Udala estutasunean ez jartzeko eta bere burua defendatzeko dimisioa eman duela argudiatu du.

Almeida Genovaren eta Ayusoren artean harrapaturik geratu da berriro.

Ayusok salatu du Casadok suntsitu nahi duela

Bigarren ekitaldian, Puerta del Solen, Ayusok irregulartasunak ukatu ditu, eta alderdiari frogak eta erantzukizunak garbitzea eskatu dizkio: "influentzia-trafikoa izan dela frogatzeko. Kontratu irregular bakar bat izan dela frogatzeko. Zintzoa ez naizela frogatzeko".

Musukoak erosteko Priviet Sportive S.L. enpresarekin 1,5 milioi euroko kontratua onartu du Diaz Ayusok, baita Tomas bere anaiak konpainiarekin dituen harremanak ere, baina "guztia erabat legezkoa" eta "Ogasunean aitortua" izan dela azpimarratu du.

"Zure alderdiko buruzagiek babestu beharrean, suntsitu nahi izatea oso mingarria da", adierazi du Diaz Ayusok. Alderdikideei ahotsa emateko Madrilgo PPren kongresua deitzea eskatu du berriro.

Diaz Ayusok ez du Almeida kritikatu.

PPk Ayusori espedientea ireki dio

Hirugarren ekitaldia Genovak hartu du, PPren egoitza nagusiak. Teodoro Garcia Egea Alderdi Popularreko idazkari nagusiak Madrilgo presidentearen aurkako txostena egiten ari zirenik ukatu du, eta "guztia eman dion zuzendaritzaren kontra modu ankerrean eta bidegabean" egiteagatik kritikatu du.

Ayusori espedientea zabaldu diotela eta zerbitzu juridikoak "zuzenbidean" eman beharreko pausoak aztertzen ari direla jakinarazi du Egeak. Azpimarratu duenez, PPren zuzendaritzak "sekula ez dio inori deliturik leporatu", praktika egokien protokoloa irekitzera mugatu zen ustezko irregulartasunen berri izan bezain laster.

Irailean egindako bilera batean, ustezko komisioen berri izan zutela jakinarazi zion Casadok Ayusori. Urriaren 20an, Egea Madrilgo presidentearekin bildu zen, azalpenak eskatzeko, iritzia aurretik eman gabe.

Hala ere, Genovak ez du dokumentaziorik jaso, "eraso, irain eta gezur kanpaina masibo" bat baizik, baita kongresua aurreratzeko eskaera ere, argudiatu duenez.

"Hori da benetako arrazoia eta ez besterik, eta orain zuen aurrean egia azaldu da", adierazi du Egeak. "Alderdiaren siglak ustekabeko arazoei aurre egiteko inork erabiltzea ezin da onartu", erantsi du.

EFE albiste agentziak aipatutako PPren Zuzendaritza Nazionaleko iturriek azaldu dutenez, alderdiko buruzagi guztiek ezagutzen zuten auzia, eta Ayusoren azalpenak "leherketa kontrolatu" bat izan direla uste dute.

Erkidegoetako presidenteek azalpenak eskatu dituzte goizeko lehen orduan, baina alde ezberdinen agerraldien ostean isiltasuna gorde dute.

Zalantzaz betetako etorkizuna

Etorkizunean ziurgabetasuna da nagusi. PPren Zuzendaritza Nazionalak ez du Ayusori zabaldutako espedientearen amaiera nolakoa izan daitekeen aurreratu.

Besteak beste, PPren estatutuek alderditik kanporatzea aurreikusten dute, "desleialkeria" egotziz gero. Arrazoi berdinagatik lau edo sei urtez alderditik at utzi dezakete ala PP ordezkatzeko inhabilitatu.

PPk ez du sekula kargu publikoan dagoen buruzagi bat kanporatu, are gutxiago erkidegoko presidente bat; beraz, ez dago aurrekaririk. Gainera, Madrilgo kongresua eta Kongresu Nazionala ortzi-mugan daude.

Bitartean, sare sozialen bidez Pablo Casadoren zein Isabel Diaz Ayusoren jarraitzaileek publikoki jarrera azaldu dute.

Hori gutxi ez balitz, PP Gaztela eta Leonen Vox ultraeskuineko alderdiarekin gobernatu ala ez erabakitzeko barne eztabaidan murgildurik dago.

5:49

Ayusoren aldekoek eta zenbait mariachik elkarretaratzea egin dute PPren egoitzan