EAJk Mikel Bilbao zerrendaburu jeltzalea izan zenari Mundakako Alkatetza kendu dio

Irati Gondra jeltzalea Mundakako(Bizkaia) alkate izendatu dute gaur, Mikel Bilbao EAJko zerrendaburua izan zenaren aurkako zentsura-mozioa onartu ondoren.

Mundakako alkatea kargutik kentzeko mozioa aurkeztu zuen EAJk berak. 2019an Mikel Bilbao independentea hautagaitza jeltzaleko zerrendaburua izan zen. Zinegotzi jeltzaleek zentsura-mozioa babestu dute, Mikel Bilbaok kontrako botoa eman du, eta EH Bilduk ez du bozketan parte hartu.

2020ko udazkenean, zentsura-mozioa aurkeztu zuen EAJk, Mikel Bilbaori Alkatetza kentzeko, alkatearen eta talde jeltzalearen arteko "koordinazio falta" argudiatuta. EAJk gehiengo absolutua du Mundakan.

Hala ere, prozesuaren judizializazioak bozketa atzeratu du. Azkenean, gaur Udalbatzak bozkatu ahal izan du, eta Irati Gondra jeltzalea alkate izendatu dute.

Gaurdaino alkate izan denak bere zintzotasuna defendatu eta EAJren aurka egin du Udalbatzan. "Aholkulari juridiko zehatz bat kontratatzeko edo zinegotzi jeltzaleei dieta handiagoak ordaintzeko presioak", salatu ditu Bilbaok.

Zentsura-mozioaren bozketa izatea inork nahi ez zuela azaldu du Gondrak, "desadostasunen urte eta erdi luze honetan" Mundakako udalerriak galdu duelako.

Bizilagunei "herri hobe bat" eskaintzeko "etengabe lan" egiteko asmoa agertu du Gondrak, "beharrezko proiektu itxaropentsuak planteatuz eta aurrera eramanaz".