Politika
Heriotza
Michel Tubiana bakegilea hil da
eitb media
Giza eskubideen aldeko militantea, zuzenean parte hartu zuen ETAren armagabetzean bakegile gisa.
-
Tubiana (bigarrena eskuinetik hasita) bakegileen agerraldi batean. Argazkia: Efe
Michel Tubiana hil da gaur 68 urte zituela, giza eskubideen alde ibilbide luzea egin ostean. 2016an ETAren armagabetzean parte hartzera eraman zuen bere konpromiso politikoak.
Bake Bideak azpimarratu du Tubianak laguntza "sendoa eta erabakigarria" eman ziola Euskal Herriko bake prozesuari, armagabetzean ez ezik, Aieteko adierazpenean ere parte hartu baitzuen.
Bera jarri zen harremanetan ETArekin armak entregatzeko eskatuz, Michel Berhokoirigoin zenduaren eta Jean Noel "Txetx" Etcheverryrekin batera. Azken horrek "kolpe gogor"tzat hartu du berria.
Horregatik guztiagatik, Bake Bidea bakearen aldeko mugimenduak eskertu egin nahi izan du Euskal Herriaren alde egindako "ekarpen historikoa", eta Jean Rene Etchegaray Elkargoko lehendakariak adierazi du "laguntza iraunkorra" eman zuela.
Aljerian jaio zen arren, 10 urterekin Parisera joan zen familiarekin, eta bertan abokatu egin zen, Giza Eskubideen Ligako idazkari nagusi eta presidente izendatu aurretik.
