Frantziako Polizia ETAko ustezko kideen etxearen bila ari da

Frantziako Polizia asteburuan atxilotu zituzten ETAko hiru ustezko kideen etxea bilatzen ari da, atxiloketa gertatu zen lekutik gertu, Borgonia eta Ile-de-France artean, eta herritarrei laguntza eskatu die.

Ikerketako iturriek azaldu dutenez, etxebizitza Joigny inguruan egon liteke, Parisetik 150 kilometrora, izan ere, hango geltokian atxilotu zituzten Jon Etxeberria Oiarbide, Parisetik trenez heldu zena, eta Iñigo Sancho Marco eta Ruben Rivero Campo, lapurtutako auto batean zain zeudenak.

Segurtasun indarrek harremanetarako telefono zenbaki bat eta helbide elektroniko bat jarri dituzte inguruko hedabideetan herritarren eskutik ETAko hiru ustezko kideei buruzko informazioa lortzeko.

ETAko hiru ustezko kideak Auxerreko komisariara eraman zituzten atxilotu eta berehala, eta terrorismoaren kontrako epailearen aurrean deklaratu beharko dute Parisen 96 orduko inkomunikazioa amaitu aurretik.