Sanchezek berretsi du "alarma egoera iragana" dela, eta etorkizuna, txertaketa

Pedro Sanchez Espainiako Gobernuko presidenteak berretsi du "alarma egoera iragana" dela, eta berriro baztertu du legea aldatzea erkidegoek neurriak hartu ahal izateko, erkidegoek eta oposizioak covid-19ari aurre egiteko lege baliabideak falta zaizkiela kritikatu arren.

Horixe adierazi du Alberto Fernandez Argentinako presidentearekin bildu aurretik egindako agerraldi labur batean, eta Auzitegi Gorenak hartuko duen erabakiak izan dezakeen eraginaren inguruan galdetu diotenean.

Presidenteak ez ditu aipatu erkidegoetako auzitegi nagusiak etxeratzeko aginduari eta itxiera perimetralei buruz ematen ari diren ebazpen kontrajarriak, eta azpimarratu du erkidegoek nahikoa baliabide legal dituztela pandemiari aurre egiteko.

Horren harira, segurtasun juridikoa bermatzea funtsezkoa dela defendatu du, eta argi adierazi du ezin dela legeekin Konstituzioa ordeztu.

"Alarma egoera iragana da. Etorkizunera begiratu behar da, eta etorkizuna, txertaketa, txertaketa eta txertaketa da", azaldu du presidente espainiarrak, alarma egoera goizegi kendu duela leporatzen dietenei begira.

Gainera, Sanchezek "koherentzia" eskatu dio oposizioari. "Ezin da orain alarma egoera faltan bota" Espainiako Gobernuak proposatu zuenean "kontra bozkatu baitzuten", gogorarazi du.