ERC bakarrik gobernatzea aztertzen ari da, 75 egun akordiorik gabe igaro ostean

ERCk, azkenean, mahai gainean jarriko larunbat honetan JxCatekin egingo duen bileran, Kataluniako Governa bakarrik osatzeko aukera, 75 egun akordiorik erdietsi ezinda pasa ostean eta Generalitateko presidente berria aukeratzeko epemugarako 25 egun baino falta ez direnean.

Hala azaldu dute ERCko iturriek, JxCati akordioa maiatzaren 1a baino lehen ixteko eskatu ostean, eta akordiorik lortzen ez bazen beste aukera batzuk aztertzen hasiko zirela iragarri ostean.

JxCatek berak proposatu zuen Pere Aragones president hautatu eta eurak oposiziora pasatzeko aukera, ez bazen ERCrekin legegintzaldirako akordio sendorik lortzen; orain, maiatzaren 1eko epea igarota, errepublikarrak aukera horri heldu ala ez pentsatuko dute, otsailaren 14ko hauteskundeetatik 75 egun igaro direnean.

Lehen bozketan porrot egin ostean, ERCren Generalitaterako hautagaiak ez zuen lortu hautatua izateko babes nahikoa bigarren bozketan, bere alderdiaren eta CUPen aldeko 42 boto jaso baitzituen, gehiengo absolututik (68 gutxienez) urrun, JxCat abstenitu egin zen bozketa horretan.

Elsa Artadi Juntseko presidenteordearen ustez, ulergaitza da ERCk "ultimatumak" jartzea maiatzaren 1a baino lehen akordio bat lortzeko, orain arte egin dituzten bileretan halakorik esan ez denean.

"Harritu egiten gaitu eta ulergaitza ikusten dugu ERCk batzuetan egiten duen diskurtso bikoitza. Ultimatuma jartzen da, baina pribatuan ez zaigu horrelakorik esan, ez eta  gaia atera ere", azpimarratu du prentsaurreko telematikoan, aste honetan.