Urkulluk Artolazabalen esku utzi ditu Giza Eskubide eta Bizikidetza zein Emakunde

Eusko Jaurlaritza berriaren sailburuek asteartean egingo diete zin euren karguei Ajuria Enean, eta egun horretan bertan egingo dute lehen Gobernu Bilera. Aurrez, astelehen honetan bertan, Euskal Herriko Agintaritzaren Aldizkarian argitaratuko da Iñigo Urkullu lehendakariaren gobernu berriaren sail bakoitzaren izena eta eskumenak zehazten dituen dekretua, eta biharamunean, berriz, horien buru izango diren sailburuen izenak jasoko dituena.

Hurrengo Eusko Jaurlaritzak 2 lehendakaritzaorde (departamentuak izango dira: bat Josu Erkoreka jeltzalearen esku, eta bestea Idoia Mendia sozialistaren esku) eta 11 sail izango ditu: 

- Lehendakaritza bi lehendakaritzaorde.
- Segurtasuna.
- Lana eta Enplegua.
- Gobernantza Publikoa eta Autogobernua.
- Ekonomiaren Garapena, Jasangarritasuna eta Ingurumena.
- Ekonomia eta Ogasuna.
- Hezkuntza.
- Lurralde Plangintza, Etxebizitza eta Garraioak.
- Osasuna.
- Berdintasuna, Justizia eta Gizarte Politikak.
- Kultura eta Hizkuntza Politika.
- Turismoa, Merkataritza eta Kontsumoa.

Iñigo Urkulluren hirugarren agintaldi honetan, Giza Eskubideen, Elkarbizitzaren eta Elkarkidetzaren Idazkaritza Lehendakaritzatik kanpo geratuko da, eta Berdintasun, Justizia eta Politika Sozialeko Sailaren barruan egongo da. Horren ondorioz, Oroimenaren, Elkarbizitzaren eta Giza Eskubideen Institutua (Gogora) eta Garapenerako Euskal Agentzia Beatriz Artolazabal sailburuaren esku geratuko dira, eta gauza bera gertatuko da Emakunderekin.

Aldaketekin jarraituz, Lana eta Enplegua sail berean egongo dira, eta Osalan eta Lanbide esleitutako organoak izango dira. Idoia Mendia izango da sail horreko arduraduna.

Bestalde, Garapen Ekonomikorako Sailak Arantxa Tapiaren esku egoten jarraituko du, eta lehen Iñaki Arriolak gidatutako Jasangarritasun eta Ingurugiro Sailaren buru ere izango da Tapia. SPRI, EVE, URA, Euskadiko Kirol Portuak, NEIKER, Ihobe, Zumaiako Kirol Portua, HAZI Fundazioa, ELIKA, Basque Research and Technology Alliance Patzuergoa izango dira esleitutako organoak.

Legegintzaldi honetan, Lurralde Antolakuntzarako, Etxebizitzarako eta Garraioetarako Saila izango da berria. Iñaki Arriola izango da sailburua, eta ETS, Visesa, Alokabide eta Eusko Trenbideak izango dira esleitutako organoak.