Deustuko batzokiari "berriro eraso egin" diotela salatu du EAJk

Deustuko batzokiari hirugarrenez azken asteetan "eraso egin" diotela salatu du Bizkaiko Buru Batzarrak (EAJren BBBk). Gose greban dagoen Patxi Ruiz presoaren aldeko pintadak agertu dira Deustuko batzokian, Bilbon, Bizkaiko EAJk Twitter bidez zabaldutako ohar batean salatu duenez.

"Erasoa" gaitzetsi du EAJk esanez "denboraz eta lekuz kanpo daudela eta guztiz ulertezinak" direla, eta ez dutela "laguntzen elkarbizitzaren eta ezberdina errespetatzeko bidean".

"Jarduera horiek egiteari utz diezaiotela" exijitu du berriro EAJk, eta "Euskadiko alderdi politiko guztiei, bereziki EH Bilduri, gaitzespen horrekin bat egitea". "EH Bilduri exijitzen diogu publikoki eta argi eta garbi eraso hauetatik aldentzea", azpimarratu du Bizkaiako Buru Batzarrak, "gerta litekeelako egunotan Euskadiko kaleetan entzun diren oihu eta kontsignen egileek (marra gorri guztiak gainditzen dituztenak, guk honezkero gainditutzat jotzen genituenak) uztailaren 12an, hautestokietan, beren koalizio abertzalearen identifikazioak erakustea".

"Horregatik, EH Bildu da praktika horietatik, kontsigna eta sabotaje mafioso horietatik aldentzeko interesik handiena izan beharko lukeena", ondorioztatu du.

EAJk zenbatu duenez, Bizkaiko egoitzek 32 "eraso" jasan dituzte dagoeneko.