"Azkarregi joan" nahi izatea egotzi dio EH Bilduk EAJri

Eskolen irekierarekin eta uztailean hauteskundeak egiteko asmoarekin "azkarregi joan" nahi izatea leporatu dio Maddalen Iriarte EH Bilduko legebiltzarkide bozeramaileak eta lehendakarigaiak Iñigo Urkullu lehendakariari. "Justifikatu gabeko urgentzia bat dago, eta hori bakarrik ulertzen da jakinda euren kalkuluak egin dituztela eta hobeto datorkiela" hauteskundeak uztailean egitea, gaineratu du Iriartek.

COVID-19ak Euskadin eragindako osasun krisia eta deseskalatze prozesuaren 1 fasearen hasiera aztergai izan ditu Iriartek igande honetan Maria Solar Barakaldoko EH Bilduko bozeramailearekin, besteak beste, egindako bilera telematikoan.

Behin pandemia gaindituta eta hauteskundeak eginda, "dena berdin jarraituko duen abiapuntu hori ez dugu onartu behar, ezta krisiaren ondorioak herritarrek ordaindu beharko dituztela ere", adierazi du.

Krisia ordaindu

Iriarteren iritzian, osasun krisi hirukoitza pairatzen ari gara, ondorio ekonomiko "oso larriak" utzi dituenak, baina baita "ondorio sozialak eta psikosozialak, oso shock handia izan baita".

"Ahulezi asko begi bistan utzi ditu", azpimarratu du, "osasun publikoarenak eta Osakidetzarenak ere. Inork ez zuen espero pandemia horrela izatea, baina Osakidetza ez balitz hain murriztuta egongo eta hainbeste behin-behineko lanaldiekin, pandemiari indartsuago egin ahal izango genioke aurre".

Hauteskundeak

Uztailean hauteskunde autonomikoak egitearen inguruan, Iriartek esan du "deseskalatzea modu arduratsuan egin behar" dutela, berriro berpiztu ez dadin, eta atzemandako kasuak jarraituta.

"Gauza asko egin ditzakegu maiatzean, ekainean eta uztailean, irailean bozetara deitzeko ebaluazioa eginda eta egoerari nola egingo diogun aurre jakinda", ondorioztatu du.