Jaurlaritza, "harrituta", probintziak markatuko baitu konfinamenduaren biguntzea

Josu Erkoreka Eusko Jaurlaritzako bozeramaileak "harridura" azaldu du asteazken honetan, Espainiako Gobernuak probintziakako faseak zehaztu baitu COVID-19 gaitzak eragindako konfinamenduaren biguntzean; izan ere, probintziek ez dute eskumenik osasunean.

"Ni, Eusko Jaurlaritzaren lurralde-politikako arduraduna naizen aldetik, probintzien aldeko apustu honek harritu egin nau, kontuan izanik uste genuela Madrilen dagoen Gobernuaren lehentasuna beti izan dela plurinazionaltasuna, Estatuaren egitura abiatzeko", hausnartu du.

Gobernu-bileraren osteko prentsaurrekoan, Erkorekak gehitu du deigarria dela, haren iritziz, probintzia dela Euskadin osasunean eskumenik ez duen maila bakarra. Probintzien garrantzia, osasunean, "ezdeusa" da.

Bozeramaileak adierazi duenez, bere iritzi pertsonala da hori. Onartu egin du Eusko Jaurlaritzak asteartean izan zuela planaren berri, Espainiako Gobernuak iragarri zuenean; beraz, ez dago ebaluazio osorik egiteko moduan.

Iñaki Arriola sailburua ere bazegoen prentsaurrekoan (PSEkoa da Arriola, Ingurumen, Lurralde Plangintza eta Etxebizitza sailburua); esan duenez, asteazken honetan izandako bileran, Jaurlaritzak ez du aztertu aipatutako plana.

Probintziaren gaiari dagokionez, gogorarazi du Jaurlaritzak, koronabirusaren bilakaeraren berri ematen duenean, probintzietako datuak ere ematen dituela. Konfinamendua biguntzeko planak, adierazi du Arriolak, neurri eta baldintza "orokorrak" jasotzen ditu, eta, kontuan izanik garatu behar dela, "elkarrizketa eta koordinazioa" egon behar dira, Espainiako Gobernuaren eta autonomia-erkidegoetako Gobernuen artean.