Parlamentuko Mahaiak diputatu-agiria kendu dio Torrari

Kataluniako Parlamentuko Mahaiak diputatu-agiria kendu dio Quim Torra presidenteari, aurrez Xavier Muro ganberako idazkari nagusiak emandako agindua beteta. Izan ere, idazkari nagusiaren agindua ez betetzeko JxCatek egindako proposamena ez bozkatzea erabaki du Mahaiak, ERC, PSC eta Cs alderdien aldeko botoarekin. Horrenbestez, Muroren agindua bete du Mahaiak.

Erabakia gogor kritikatu du JxCatek, eta Mahaiaren eta Roger Torrent Parlamentuko presidentearen aurka egin du.

Idazkari nagusiak bere idatzian argudiatzen zuenez, Auzitegi Gorenaren ebazpenak eta Hauteskunde Batzordeak emandako epemugak "orain arte kontrakoa argudiatzeko zeuden baldintzak aldatu dituzte".

Bien bitartean, Bartzelonako Hauteskunde Batzordeak diputatu-ziurtagiria igorri du Maria Senserrich JxCateko kidearen izenean, hark Torraren lekua bete dezan (zerrendan hurrengoa zen Senserrich).

Lazo horien auzia tarteko, Kataluniako Auzitegi Nagusiak urtebete eta erdiko gaitasungabetzea ezarri zion Torrari. Horren ondotik, urtarrilaren 3an, diputatu-agiria kentzea agindu zuen Espainiako Hauteskunde Batzordeak.

Joan den astean inhabilitazioari eustea erabaki zuen Auzitegi Gorenak, eta segidan Torra ordezkatzeko 48 orduko epea eman zuen Hauteskunde Batzordeak. Bi ebazpen horiei men eginda agindu du Murok diputatu-agiria kentzea.

Torrak oraingoz ez du adierazpenik egin, eta Gonzalo Boye bere abokatuaren txio bat bertxiotzera mugatu da. Abokatuak zalantzan jarri du Xavier Murok agindu hori emateko eskuduntzarik ote duen. Boyeren hitzetan, "printzipio demokratikoak daude jokoan, ordezkaritzarako eskubideak. Zigor Kodeak bereziki babesten ditu. Berandu baino lehen, Europako Justiziaren galbahetik pasatu beharko da auzi guztia".

JxCatek Kataluniako Gobernuaren jarraipena baldintzatzen du

Josep Costa Kataluniako Parlamentuko presidenteordeak (JxCat) Kataluniako Gobernuaren jarraipena mantentzeko eta aurrekontuak onartzeko baldintza ezarri du: Quim Torra Generalitateko presidenteak Kataluniako Parlamentuan diputatu izaten jarraitzea.

Albert Batet talde parlamentarioko presidentearekin batera emandako prentsaurrekoan ohartarazi duenez, astelehen honetan, ezohiko urgentziagatik, Torra diputatu gisa berresteko eta "Hauteskunde Batzorde Zentralaren erabakiak inpugnatzeko" ebazpen proposamen bat erregistratuko dute, "Kataluniako Parlamentuaren subiranotasunaren aurkako atentatua" baita.

"Kataluniako Gobernuan eta aurrekontuetan jarraipena dagoela bermatzeko modurik onena Torrak diputatu izaera ez galtzea da", ohartarazi dute.

ERCk Torraren botoa bertan behera uztea eskatu du

Sergi Sabria ERCk Kataluniako Parlamentuan duen taldeko presidenteak Quim Torra Generalitateko presidentearen botoa "bertan behera uztearen" alde egin du astelehen honetan, Kataluniako ganberaren "subiranotasuna" defendatzeko eta "desobedientzia antzua eta sinbolikoa" saihesteko.

Kataluniako Ganberan emandako prentsaurrekoan, Sabriak adierazi du ERCren iritziz, "Torra presidentea da ondorio guztietarako eta politikoki ere diputatua da", baina Kataluniako Parlamentua "arriskuan" ez jartzeko eta bozketak "baliozkoak" izan ez daitezen, botoa "bertan behera" uztea erabaki du.

Errepublikanoen buruzagi parlamentarioak salatu duenez, Hauteskunde Batzorde Zentralak eta Auzitegi Gorenak "katalanen eskubideei eraso egin diete berriro, euren botoak usurpatuz", eta euren erabakiekin "Generalitateko presidentea legez kanpo etzan eta indar independentistak zatitu" nahi dituztela gaineratu du.

"Ez gaitezen Estatuaren tranpan erori", jarraitu du, eta "desobedientzia sinboliko berri bat" saihestera deitu du, "erakundeen kolapsoa" ekarriko lukeena.

"Alternatiba oso agerikoa da: aurrekontuak edo erakundeen paralisia", berretsi du Sabriak laburpen gisa, eta ohartarazi du Torrak erabakitzen den guztia ganberan bozkatzen badu inpugnatu egingo dela: Irismen laburreko sinbolismo batean murgildu gara".

Horrenbestez, Sabriak "kontakizun magikorik ez elikatzea" eskatu du, eta independentismoak "Estatu indartsu baten aurrean" dagoela ez ahaztea.

ANCk bilkura deitu du arratsalderako

Kataluniako Asanblada Nazionalak (ANC) "premiazko deialdia" egin du 15:00etarako Kataluniako Parlamentuaren aurrean bilkura egiteko. Elkarretaratzearen asmoa "subiranotasuna defendatzea" eta Torrari diputatu-akta kentzeko aginduaren kontra protesta egitea da, ANCren arabera.

¿¿¿¿ ¿ Convocatòria d’urgència!

Tothom al Parlament: defensem la seva sobirania, la nostra sobirania.

¿ 15 h
¿ Parlament de Catalunya#StandUpForCatalonia pic.twitter.com/maztgFQWyr

— Assemblea Nacional Catalana (@assemblea) January 27, 2020

PPren eta Ciudadanosen ohartarazpenak

Ciudadanosek eta PPk ohartarazi dutenez, Torrak osoko bilkuran bozkatzen badu auzitara joko dute Torrent eta Mahaiko kideen aurka, desobedientzia delitua leporatuta.

Bestalde, Torraren aurkako prozesu judizialak legealdiaren amaiera ekarriko duela iradoki zuen CUPek ostegunean, eta horren amaiera duina adostearen alde egin zuen: "Espero dugu duintasunez eta intromisio maila berean erantzutea".

Osoko bilkurako gai-zerrendak Kataluniako Parlamentuko aurrekontuen bozketa aurreikusten du, azken egunotan polemika sortu duten arren. Izan ere, diputatuen soldata % 1,75 igotzeko proposamena onartu zuen Mahaiak joan den astean, JxCat, CS eta PPren aldeko botoekin eta ERC, PSC eta CUPen abstentzioekin. Catalunya en Comuk, berriz, kontra bozkatu zuen.