Presoen urruntzeak bi auto-istripu gehiago eragin dituela salatu du Etxeratek

Etxerat euskal preso eta iheslari politikoen senide eta lagunen elkarteak "presoei ezarritako urruntzearen eraginez asteburuan izandako bi auto-istripu" salatu ditu. Ildo horretatik, lau lagun zauritu direla nabarmendu du, baina, "zorionez, ez dute kalte larririk jasan".

Ostiral arratsaldean, Alboloteko espetxean (Granada, 840 km) dauden Ainhoa Mujika eta Jon Olarra preso donostiarren lagunek talka egin zuten N-1 errepidean, Madrildik gertu, euriteak auto-ilara luzeak eragin zituen tarte batean. Dena dela, bidea egiten jarraitu zuten, hurrengo egunean bisita egin ondoren berriz ere etxera itzultzeko.

Bestalde, larunbatean, Villabonan (Asturias, 440 km) espetxeratutako Olga Comes preso iruindarraren bi senide, tartean adingabe bat, auto-istripu bat izan zuten Altuben, presoari bisita egin ondoren. Furgoneta bihurgune batean atera zen, bazter babesarekin talka eginez, euriaren ondorioz aurretik beste bi istripu izan ziren leku batean.

Testuinguru horretan, Etxeratek salatu duenez, bi ezbehar berri horiek "zortzira igo dute aurten senide eta lagunek jasan dituzten istripuen kopurua". Elkarte horren esanetan, "30 urtez 1.000 zauritu inguru eta 16 hildako eragin ditu dispertsioak senide eta lagunei egitera behartutako bidai luzeetan".

Arrazoi horregatik, elkarteak dio "premiazkoa" dela "senide eta lagunei ezarritako kondenari amaiera jartzea, dispertsioak eragindako hildakoen aitortza lortzea eta preso guztiak Euskal Herrira hurbiltzea, asteburu honetan gertatutako istripuak bezalakoak inoiz gehiago gerta ez daitezen".

Halaber, Etxerat elkarteak elkarretaratzeak deitu ditu Hego Euskal Herriko lau hiriburuetan, istripu horiek salatzeko.

¿¿Asteburuan senideek izandako bi istripuek dispertsioarekin amaitzea ezinbestekoa dela erakusten digute berriz ere, atzo Gernikan adierazi genuen bezala.

Elkarretaratzeak konbokatu ditugu#kondenatua #dispertsioastop https://t.co/T19brDa608 pic.twitter.com/56AzHCXLyz

— Etxerat Elkartea (@EtxeratElkartea) November 24, 2019