'Mendekuak bultzatuta' jardutea egotzi diote kartzelatutako politikariek Estatuari

Proces auziaren epaia argitaratu ostean, kondenatutako liderrek horren gainean hitz egin dute. Hala, Oriol Junqueras ERCko lider eta Kataluniako presidenteorde ohik bere "uste oso demokratiko eta errepublikanoak" berretsi ditu, eta Estatuari "mendekuak bultzatuta" jardutea egotzi dio. Horixe esan du zabaldutako gutun batean, epaiak 13 urteko kartzela-zigorra ezarrita.

ERCeko militantziari zuzendutako gutun batean, Junquerasek dio "independentzia, gaur, inoiz baino gehiago, beharra da, gizarte libreago, zuzenago eta demokratikoago batean bizi ahal izateko"; haren iritziz, epaiarekin, "suntsitu nahi izan gaituzte, askatasuna lortzeko borrokan dabilen kataluniarren belaunaldi bat txikitu nahi izan dute".

Junquerasen arabera, epaiaren bidez (berak jaso du zigorrik gogorrena), "bizitzak suntsitu nahi dituzte, alderdiak eta lidergoak burugabetu, mugimendu politiko eta demokratiko bat geldiarazi eta txikitu, eta hautestontzietan hitz egin nahi duen herri oso bat isilarazi".

"Gaur, demokrazia, Estatu espainiarrean, hautsi da, eta horren botereak mendekua erabiltzen ari dira; izan ere, ez dute ulertzen justiziaz, politikaz, prozesu demokratikoez"; hortaz, beste behin, erakutsi dute "Espainiako Erresumaren batasuna edozein gauzaren gainean dagoela, nazioarteko ospearen gainetik ere, eta, ziur aski, Estatuaren beraren biziraupenaren gainean ere".

ERCko presidenteak deia egin du "mendekuak alde batera uzteko, eta geure burua itxaropenez betetzeko, ordu latz hauetan"; halaber, eskatu du injustizia bilakatzea "energia, adore eta indar demokratiko".

"Mina egiteko borondateak soilik bultzatuta jarduten dutenei, hauxe esan nahi diegu: gaur ez da ezer amaitu, ez duzue irabazi, eta ez duzue konbentzituko; harro itsuak mugiarazten dizue, horrek bakarrik".

ERCko liderrak, jarraian, adierazi du "itzuliko" direla, "eta indartsuago, gainera": "Irabazteko jaio den belaunaldia gara, garaipen guztien hazia".

Junquerasen iritziz, epaiak gauza bat egiaztatzen du: "Kataluniarrok ez dugula beste aukerarik; aukera bakarra Estatu berria eratzea dela, honetatik alde egiteko. Demokratak zigortzen ditu, bozkatzea eta protestatzea debekatzen du, eta ideia politikoengatik espetxeratzen du".

Kataluniako independentzia, hortaz, "beharra da"; berak ez du nahi haren seme-alabak "Estatu ustel, bihozgabe eta jendearen aurkakoan" haztea, eta, ondorioz, "hitzematen dizuet, ez naiz geldirik egongo lortu arte".

Junquerasek hau ere esan du: "Kartzela, gogorra eta bidegabea izanda ere, askatasuna lortzeko bidean beste etapa bat baino ez da, etorkizuna markatu behar duen hazia landatzeko etapa bat da".

Auzitegi Gorenean izandako epaiketaz, Junquerasek dio "hainbat aldiz" esan zutela "instrukzioa ez zela bidezkoa izan, ezta epaiketa ere, eta Estatuak anker jokatuko zuela"; bi urteko prebentziozko espetxe-zigorra "epai honen hitzaurrea zen".

ERCko agintariak gogorarazi du zer ekarri zuen, Kataluniarentzat, "frankismoaren gau luzea", eta nola jasan zuten errepublikanoek errepresioa: "Lluis Companys presidentea fusilatu zuten, urrian ere, baina duela 79 urte".

"Gaur, berriro ere, herrialdearen etorkizuna erabaki nahi duten kataluniarren beste belaunaldi oso bat suntsitu nahi dute; belaunaldi hori behin betiko askatasuna bereganatzeko prest dago. Ezin izango gaituzte txikitu; gure amonek aurrera egin zuten, baldintza askoz ere gogorragoetan, eta geuk ere egingo dugu", ohartarazi du.

Joaquim Forn, Jordi Turull eta Josep Rull kontseilari ohiek 2017ko urriaren 1eko erreferenduma aldarrikatu dute, eta "Katalunia aske" baten aldeko oihua egin dute. Twitterren, 12 urteko kartzela-zigorra ezarri dion epaiari erantzun dio, mezu labur baten bidez: "Gora Katalunia askatuta".

VISCA CATALUNYA LLIURE!

— Jordi Turull i Negre (@jorditurull) October 14, 2019

10 urteko zigorra jaso duen Rullek, aldiz, salatu du kondenatu dituztela "ideiak epaitu dituztelako", eta erantsi du: "Gu zigortzen, U1ean botoa eman zuten 2,5 kataluniarrak zigortu dituzte. Europak XXI. mendean bizi izan duen demokrazia-ekintzetako apartenetakoa izan zen hura".

Fornek (10 urteko kartzela-zigorra ezarri diote) jasotako babesa eskertu du: "Ez dugu etsiko. Gora Katalunia askatuta!".

Carme Forcadell Kataluniako Parlamentuko presidente ohiak salatu du "bidegabekeria gauzatu dela", eta deitoratu du demokraziak "egun iluna" duela gaur: "Parlamentu- eztabaida librea ez de delitua, eskubidea eta beharra da erabiltzea. Behar beste aldiz esango dugu, beharrezkoa den tokietan", idatzi du Twitterren. "Ezkortasunak ez gaitu menderatuko. Aurrera egingo dugu!", esan du Forcadellek.

La injustícia s'ha consumat. El lliure debat parlamentari no és delicte, és un dret exercir-lo i un deure defensar-lo. No ens cansarem de dir-ho allà on faci falta. Avui la democràcia viu un dia fosc, però ni en moments així el derrotisme ens ha de vèncer. Ens en sortirem!

— Carme Forcadell (@ForcadellCarme) October 14, 2019

12 urteko zigorra jaso duen Raul Romeva Kanpo Ekintza kontseilari ohiak salatu du "mugimendu oso bat" zigortu nahi dutela, baina ohartarazi du "oker" daudela.

Ildo horretan, Romevak adierazi du "milioika herritarren asmo politikoak aldaraziko dituen epairik ez dagoela", eta eskatu die herritarrei eusteko, "zutik, borrokalari eta duin".

Jordi Cuixart Ominum Culturaleko liderrari 9 urteko espetxe-zigorra ezarri diote; Cuixartek, epaiari erantzuteko, berrerortzerako deia egin du: "Berriro egingo dugu. Amnistia, demokrazia eta autodeterminazioa", idatzi du Twitterren Lledonerseko kartzelatik.

Missatge des de la presó:
La resposta a la sentència, reincidència #HoTornaremAFer Amnistia, Democràcia i Autodeterminació.

— Jordi Cuixart (@jcuixart) October 14, 2019

Meritxel Borras kontseilari ohiak salatu ditu kartzela-zigorrak, eta ohartarazi du horiek ez dutela errazten "konponbide politikorik". Catalunya Radiori eta Rac1-i egindako adierazpenetan, Borrasek (ez da espetxean sartuko) esan du "zigorrak bidegabeak direla", eta arbuiatu du sedizio-deliturik egon izatea: "Gehienez jota, nirea bezalako zigor bat, desobedientziagatik, baina besterik ez", erantsi du.

Borrasek, gainera, kritikatu du epaia komunikabideetan argitaratu izatea: "Estatu serio batek ez luke zertan horrela ibili", esan du.

Santi Vila Enpresa kontseilari ohiak "Estatu sena" eta "begirada altuak" eskatu ditu; izan ere, haren iritziz, politikariek lan egin behar dute kataluniar gatazkari konponbidea emateko.

Vila ez da espetxean sartuko, absolbitu egin baitute dirua ustez bidegabe erabili izateagatik, baina, Ser Catalunyan izandako elkarrizketa batean, esan du "triste" dagoela Auzitegi Gorenak ebatzitako "zigor oso gogorrengatik".

"Kataluniako sufrimendu kolektiboa zorroztuko duten zigorrak daude, bai eta Estatuko jende onarena ere; egungo egoera politikoa larrituko dute, eta balizko konponbideak", babestu du.

Kontseilari ohiak esan du epaiak frogatzen duela "gatazka honi ez diola auzitegi batek amaiera emango"; ondorioz, aldarrikatu du "eskatu beharko zaiela, Bartzelonan eta Madrilen, gure politikariei, Estatu sena eta begirada altuak, irtenbidearen zatia izan daitezen, ez arazoaren zatia".