Pello Urizar Eusko Alkartasunako idazkari nagusiak dimisioa eman du

Pello Urizar Eusko Alkartasunako buruzagiak alderdiko idazkari nagusi gisa dimisioa eman du astelehen honetan, alderdiak agiri batean jakinarazi duenez.

Urizarrek EAko Kontseilu Nazionalean aurkeztu du dimisioa astelehen honetan. Astearte honetan 11:30 aldera prentsaurrekoa emango du Donostian, dimisioaren arrazoiak azaltzeko.

Kontseilu Nazionalak, alderdiko estatutuak jarraituz, ezohiko batzarra deitu du, jarduneko idazkari nagusi bat izendatzeko eta barne-hauteskundeak martxan jartzeko.

Politikari gipuzkoarrak 2009ko ekainean hartu zuen Eusko Alkartasunako Idazkaritza Nagusia, ezohiko biltzarrean. Unai Ziarreta aurreko kargudunak dimisioa eman ondoren deitu zuten batzarra, EAk martxoko hauteskundeetan emaitza txarrak lortu zituelako.

Ezker abertzalearekin elkarlana gidatu duen EAko buruzagia izan da Urizar, EH Bildu koalizioa osatu arte. Eusko Alkartasuna EAJren zatiketatik sortu zen.

Sare sozialen bidez zabaldutako mezu batean, Pello Urizarrek alderdia zuzendu duen hamarkadan "bakegintza eta justizia sozialaren alde egindako lanak emaitzak" eman dituela goraipatu du EAk. "Aro politiko berri honetan, lehen lerrotik urrundu egingo da ziklo berri bati bide emateko", ziurtatu du alderdi abertzaleak.

10 urteotan egoera desberdinak bizi izan ditu @pellourizar-ek.
Ziklo bat itxi eta beste bat irekitzeko unean, kargua utzi du EAko Idazkari Nagusiak, garai berri honetan pertsona eta ideia berriei bide emateko.

Bihar 11.30tan prentsaurrekoa emango du Donostian. #MileskerPello pic.twitter.com/X9waZJhQ6D

— Eusko Alkartasuna (@ealkartasuna) 24 de junio de 2019

Europa Press albiste-agentziak jakitera eman duenez, oraingoz Iker Ruiz de Egino alderdiko bozeramaileak Idazkaritza Nagusia har dezake. Loiun jaio zen, 1976an, eta Ekonomia Zientziatan lizentziatua da. Gipuzkoako Foru Aldundiaren Turismo eta Atzerri Harremanetarako zuzendaria izan zen.

Koalizio abertzalea sortzeko orduan egindako lana eskertu dio Maddalen Iriarte EH Bilduko legebiltzarkideak Urizarri. "Herri honen askatasunaren" alde egindako lana eskertu dio Iriarte Urizarri sare sozialetan, "guztiok bizitza duina eta askea izan dezagun". Gainera, besarkada eman dio eskainitako laguntzagatik. Azkenik, "ez urrutira joan", esan dio.

Herri honen askatasunaren alde, guztiok bizitza duin eta askeak izateko egindako lanagatik, @ehbildu eraikitzen egindakoagatik mila esker @pellourizar . Pertsonalki emandako laguntzagatik eta zure barreagatik besarkada bat. Ez urrutira joan. pic.twitter.com/BB8FwgAMGZ

— Maddalen Iriarte (@MaddalenIriarte) 24 de junio de 2019