Troitiño kasuan 'zuhurtziaz' arituko dela esan du Botere Judizialak

Gabriela Bravoren, Botere Judizialaren Kontseilu Nagusiaren bozeramailearen, arabera, ez da Troitiñoren kasuarekin bat datorren kexarik aurkeztu epaileen gobernu-organoaren aurrean eta "nolabaiteko itxura jurisdikzionala" duen gai bat denez, Botere Judizialak "zuhurtziaz" arituko da.

Gogoeta horiek Botere Judizialaren bozeramaileak egin ditu, Federico Trillok, PPko Justizia eta Askatasun Publikoen koordinatzaleak, egindako adierazpenei buruz galdetu diotenean. Trillok ikerketa bat hastea eta Antonio Troitiño ETAko kidearen askatasunaren inguruan sortutako "kontraesanen" erantzukizunak argitzeko eskatu dio Kontseiluari.

Bravok Kontseiluaren aurrean kexarik aurkeztu ez dela esan du, eta adierazi duenez, hurrengo egunotan aurkezten bada edo Auzitegi Nazionalaren Gobernu-aretoak disziplinazko xehetasunak dituen txosten bat bidaltzen badu, "ikerketa bat hasiko du, noski".

Kontseiluko bozeramailearen arabera, "alarma, gizarte espainiarraren esparruan sortu den ezinegona eta kezka handia" ulertzen du, baina uste duenez, "ezin dugu ahaztu nolabaiteko itxura jurisdikzionala duen gai baten aurrean gaudela".