Bixintxo Bilbaori kendu egin diote ikurrina erakusteagatik jarritako zigorra

Xabier Cazaubon Nazioarteko Pilota Federazioko presidenteak kendu egin dio Bixintxo Bilbao Ziburuko pilotariari ikurrina erakusteagatik jarritako zigorra, gaur ohar batean jakinarazi duenez.

Munduko Txapelketako sari banaketan ikurrina erakusteagatik nazioarteko txapelketatik kanpo utzi zuten Bilbao urtebetez, arauz kanpoko bandera zela argudiatuta.

Gaur oharra argitaratu du Cazaubonek "bere erabaki pertsonala" jakinarazteko, argudioak eman ez baditu ere.

Dena dela, gogor salatu ditu azken egunotan "ahoz zein idatziz jasotako mehatxuak". "Ezerk ezin du justifikatu indarkeria, iraina, deskalifikazioa eta gezurra erabiltzea pilotaz ari garenean, eta are gutxiago, kirolaren baloreetatik urrun dauden lorpenak jomuga, helburu politikoekin aritzea".

Era berean, Julian Garcia Angulo presidentearen eta Juan Carlos Soto medikuaren babesa eskertu eta Federazioaren Diziplina Batzordearen lana hartu du aintzat.

Erreakzioak

Zigorrak polemika handia eragin zuen, eta asko izan ziren pilotariari babesa erakutsi ziotenak. Gaurko erabakiaren ondotik ere, iritzia eman dute zenbaitzuek. Andoni Ortuzar EAJren EBBko presidentea izan da hitz egiten lehenengotarikoa. Txio baten bidez, "pozik" hartu du zigorra kentzeko erabakia. Ortuzarren hitzetan, "erabaki justua, egokia eta ona izan da euskal pilotarentzat".

Acojo con satisfacción la noticia de que Xavier Cazaubon, presidente de la @FIPVOficial, ha levantado la sanción a Bixintxo Bilbao por exhibir la ikurriña en el podio. Se trata de una decisión justa, oportuna y buena para el mundo de la pelota vasca.https://t.co/E6Wsgdxfl9

— Andoni Ortuzar (@andoniortuzar) 28 de febrero de 2019