Urtebeteko zigorra Bilbaori, Munduko Txapelketan ikurriña ateratzeagatik

Bixintxo Bilbao pilotari ziburutarrari urtebeteko zigorra jarri dio Nazioarteko Pilota Federazioko Diziplina Batzordeak, iazko urrian, Bartzelonako Vall d'Hebronen jokatutako binakako Trinketeko Munduko Txapelketako finalean ikurriña ateratzeagatik. Frantziako selekzioarekin hartu zuen parte Bilbaok, eta irabazi egin zuten. Sari-banaketan, podiumean zeudela, astindu zuen ikurriña.

Baimenduta ez dagoen bandera bat erakustea "arau-hauste larria" dela esan du Disziplina Batzordeak, eta hori dela eta, urtebetetez ezingo du jokatu pilotariak Nazioarteko Pilota Federazioak antolatutako txapelketetan.

ETBk egindako elkarrizketan, Bilbao "lasai" agertu da eta egindakoaz "damurik ez" duela nabarmendu du. "Harro izan behar dugu nondik heldu garen, eta gure koloreak erakustea poz bat da. Nik berriz egiteko baldin bazen, berriz egingo nuke", ziurtatu du.

Helegitea jarriko duela ere aurreratu du pilotariak, eta zigorra kenduko dioten itxaropena agertu du.

Elkartasun oldea

Albisteak hautsak harrotu ditu, eta elkartasun oldea jaso du Bilbaok azken egunotan. "Harrituta" dagoela aitortu du pilotariak: "Mezu asko jasotzen ari naiz, txapela irabazi nuenean baino gehiago. Euskaldun jende aunitz, Hegoaldeko pilotari asko, eta Iparraldekoak ere. Sustengua ukan dut eta ukaiten ari naiz. Horrek plazer egiten du", gaineratu du.

Franck Dolosor ETBko kazetariak sare-sozialen bidez gertatu dena salatzeaz gain, azalpen historiko bat ekarri du gogora: Bixintxoren aitonak Gernika Batailoian nazien aurka borrokatu zuen Frantzia askatzeko, ikurriña paparrean zuela:

Soutien total à Bixintxo Bilbao. Quelle honte!

Est ce que ces incultes savent qu'il y a 74 ans son grand père a participé à la libération de la France avec ce même ikurriña?https://t.co/8Aqg2PhZeo

— Franck Dolosor (@FranckDolosor) 23 de febrero de 2019

Politika mundutik ere etorri zaizkio mezuak:

Lotsagarria. Honteux et intolérable. De vergüenza. https://t.co/jHXpSEqKO8

— AITOR ESTEBAN (@AITOR_ESTEBAN) 24 de febrero de 2019

-Nora zoaz eskual semea
Pilota hori eskutan?
-Pilota hartzera deitzen naute
Frantsen aldera
Puni pour la patrie
Puni pour la patrie
Ikurriña bakarrik maite zuten haiek
Puni pour la patriehttps://t.co/4AeHTtXrCg

— mikel otero (@otero_mikel) 23 de febrero de 2019