Eskualdatu gabeko eskuduntzen egutegia izan dute hizpide Erkorekak eta Batetek

Josu Erkoreka Eusko Jaurlaritzako Gobernantza Publikoko eta Autogobernuko sailburuak eta  Meritxell Batet Espainiako Gobernuko Lurralde Politika eta Funtzio Publikoko ministroak bilera pribatu bat egin dute, gaur goizean, Bilbon. Gasteizko Gobernuak ohar bidez jakitera eman duenez, "bi gobernuen artean negoziatzeke dauden 37 eskumenen gaineko lan egutegiaz hitz egin dute" batzarrean.

Bi buruzagiok arratsaldean elkartuko dira, berriz, Transferentzien Batzorde Mistoan. Zazpi urtez egon da batzorde hori bildu gabe.

Joan den asteartean, azaroaren 20an, AP-1 autobidearen Armiñon eta Burgos arteko zatia eta Alonsotegi-Barakaldo eta Bilbao-Basauri trenbide lineak EAEren esku uzteko "aurreakordioa" hitzartu zuten Madrilek eta Gasteizek, eta gaurko bileran gauzatuko dituzte transferentzia horiek.

Pedro Sanchezen Gobernuak "pozik" hartu zuen aurreakordioa, PPren agintaldian "zazpi urteko atzeraldia" izan ondoren, eta Jaurlaritzak ere txalotu egin zuen akordioa, bi administrazioen arteko "negoziazioa desblokeatzea ahalbidetzen duelako", oraindik transferitu gabe dauden transferentziei begira.

Egutegia

Arantxa Tapia Ekonomiaren Garapen eta Azpiegitura sailburuak duenez, gaur arratsaldeko bileran Espetxeen eta Gizarte Segurantzaren eskuduntzak eskualdatzeko "egutegi bat" mahai gainean jartzea nahi du Eusko Jaurlaritzak.

"Egutegi bat proposatu beharko lukete, gutxienez, eztabaidari ekiteko", esan du sailburuak. Horren hitzetan, Gasteizko Gobernuak eskatzen duena "ez da behin betiko egutegi zehatz bat, transferitu beharreko eskuduntzen lehentasuna ezarriko duen gutxi gorabeherako planifikazio bat baizik".

Radio Euskadin egindako adierazpenetan, Tapiak esan du gaurko bileran adostuko diren transferentziak ez direla Jaurlaritzarentzat "pisu politiko handiena" dutenak. Halere, "zazpi urtez eskuduntzen inguruan aurrerapausorik eman gabe" egon eta gero, gaurkoa urrats "garrantzitsua" dela esan du, "beste jokaleku bat zabaldu delako".