Erkoreka: 'Transferentziak jada ez badira hitzartzen ministroaren epea ez da beteko'

Josu Erkoreka Eusko Jaurlaritzako bozeramailearen esanetan, Espainiako eta EAEko gobernuak negoziatzen ari diren hiru eskumenen inguruko transferentzia jada ez badute adosten, Lurralde Politikako Ministerioak akordioa adosteko aurreikusitako epeak hautsiko dira.

Gobernu bileraren osteko ohiko prentsaurrekoan Erkorekak gogoratu duenez, bihar (asteazkena) Transferentzien Batzorde Mistoaren ponentzia teknikoa bilduko da, bideokonferentzia bidez, hiru eskumenen transferentziaren nondik norakoak jorratzen jarraitzeko.

Ildo horretan, akordioa adosteko beharra azpimarratu du Erkorekak, azaroaren 15ean Meritxell Batet Espainiakoa Lurralde Politikako ministroak hitzarmena sinatzeko ezarritako epea bukatzen baita eta akordioa egun horretan berretsi behar delako.

Bilbo-Basauri eta Alonsotegi-Barakaldo trenbide, zein AP-1 autobideko zati arabarraren transferentziak daude mahai gainean.

Administrazio biek hainbat desadostasun mantentzen dituzte transferentzia hiru horien inguruan. Alde batetik, edukia dela eta; eta, bestetik, langileen, transferitu beharreko ondasunen eta berorien balio ekonomikoaren ingurukoak direla eta.

"Ezin dut akordioa izango denik ziurtatu, oraindik desadostasun adierazgarriak baitaude", esan du Erkorekak. Hala ere, negoziazioa apurtu egin ez dela azpimarratu du eta "akordioa egon ala ez, harremana mantentzen dugu eta akordioa adosteko asmoa izaten jarraitzen dugu", azaldu du.

Ildo horretan, Gernikako Estatutua erabat betetzeko lanean jarraitzeko konpromisoa azpimarratu du Erkorekak.