Duintasuna giza eskubideen oinarria dela nabarmendu du Urkulluk

Eusko Jaurlaritzak antolatutako 'Erronka berriak' Giza Eskubideen Nazioarteko Biltzarra itxi du ostiral honetan Iñigo Urkullu lehendakariak. Bere hitzaldian, "duintasuna giza eskubideen oinarria” dela nabarmendu du, eta “ekonomiaren, gizartearen zein solidaritatearen arloetako politikak” giza duintasunaren “kontzeptu nuklear” horretara bideratu behar direla gaineratu du.

Itxierako ekitaldia Bilboko Euskalduna Jauregian egin da. Lehendakariarekin batera, bertan izan dira Josu Erkoreka Eusko Jaurlaritzako bozeramailea eta Jonan Fernandez Giza Eskubide, Bizikidetza eta Lankidetzako idazkari nagusia, Monika Hernando Biktimen eta Giza Eskubideen zuzendaria eta Patxi Juaristi EHUko Bizkaiko campuseko erretoreordea.

“Berdintasun, egitate eta justizia-baldintzak sortzera bideratu behar da giza duintasuna, gizaki bakoitzari atxikitako ahalmenaren garapenarekin bat etorriko direnak”, esan du Urkulluk. Izan ere, gaur egungo "erronka konplexuei aurre egiteko printzipio zuzentzailea da”.

Urkulluren iritziz, “orain bezalako garai latzetan, ziurgabetasuna nagusi den hauetan, ez da erraza asmatzea”. “Ez dago formula magikorik, inork ez du egia osoa”, gaineratu du.

Dena dela, Jaurlaritzak norabidea eta norakoa ez galtzeko “orientazio-erreferentziak” gogoan dituela nabarmendu du, eta giza eskubideak “funtsezko erreferentzia” direla azaldu du.

Hala, duela 70 urte Giza Eskubideen Adierazpena idatzi zutela gogora ekarri du, akordio hura sinatu zutenek giza duintasuna “printzipioa, oinarria, inspirazioa eta konpromisoa” dela adierazi zutela esanez.

“Giza duintasunak esan nahi du pertsona ez dela bitarteko bat. Xede bat da berez, kontzienteaz aukeratu dezakeelako eta aldatu daitekeelako”, esan du Lehendakariak.

Azkenik, giza eskubideak “gu orientatzeko funtsezko tresna” izan direla esan du, eta etorkizuneko ekintza politikoaren “erreferente nagusi” izaten jarraitu behar dutela gaineratu du.