Eguiguren ez da ekitaldira joan, 'ez daudenenganako errespetuagatik'

Jesus Eguiguren PSEko presidenteak ezker abertzalearen ekitaldian egoteko gonbidapena ez onartzea erabaki du, "ez daudenenganako errespetuagatik".

Lokarri elkarteari (ekitaldiaren antolatzaileak izan dira) gutun bat igorri dio Eguigurenek, gonbidapena eskertuz. Hala ere, "erantzukizunagatik eta zuhurtziagatik" Euskalduna Jauregien ezin duela egon esan die antolatzaileei.

Hala ere, "etorkizunean gauzak alda daitezkeela" nabarmendu du PSEko presidenteak. Azkenik, bakeaz Xalbadorrek egindako bertsoa igorri die antolatzaileei: "Egun bakean zutaz kantatzera nator", hasten den bertsoa.

Gutunaren edukia zabaldu du Lokarrik ekitaldia hasi baino lehen.