Jaurlaritzak, Estrasburgoren epaiaz: 'Beste gauza bat espero genuen'

Giza Eskubideen Europako Auzitegiak zigor metaketaren auziaren inguruan emandako epaia ezagutu berritan, "beste gauza bat espero genuen" aitortu du Josu Erkoreka Eusko Jaurlaritzako bozeramaileak.

Estrasburgok arrazoia eman dio Espainiari auzi horretan, baina Estatua zigortu du hiru preso salatzaileei bidezko prozesu judizial bat eman ez ziela iritzita.

Erkorekak epaia errespetatzen duela, baina "behin-behineko" analisi bat eginda, Auzitegi Gorenak presoen zigorren harira emandako epaiarekin antza handiago izatea espero zuela esan du Gobernu Kontseiluaren bileraren osteko prentsaurrekoan.

#ETA No conozco la sentencia de #Estrasburgo pero esperábamos un pronunciamiento diferente, más en sintonía con la anterior sentencia del TS que sí reconocía el cómputo de penas dentro de la #UE pic.twitter.com/D3CgBtxA6m

— Josu Erkoreka (@jerkoreka) 23 de octubre de 2018

Erkorekaren hitzetan, Gorenaren erabakia "Europako legediarekin bat dator". "Espetxe-politikaren inguruko salbuespenei amaiera" jarri behar zaiela esan du analisi orokorrago batean Eusko Jaurlaritzako bozeramaileak.

Marlaska pozik, Espainiaren aldeko epaiarekin

Espainiako Barne Ministerioa pozik agertu da Europar Batasuneko Giza Eskubideen Auzitegiak Espainiaren alde emandako epaiarekin. Estrasburgon egoitza duen aipatu auzitegiak ETAko presoek Frantzian betetako zigorrak ez pilatzea erabaki du.

Horren aurrean, Barne Ministerioko iturriek esan dute Grande-Marlaska "kontent" azaldu dela erabakiarekin.

Ildo horretan, Estrasburgok hatutako erabakiak kasu guztietan errespetatu behar direla berretsi du Barne Ministerioak, "ez soilik epaiak Espainiaren kontrakoak direnean".