Olanok babes osoa agertu dio estatutu berriaren inguruko akordioari

Markel Olano Gipuzkoako ahaldun nagusiak babes osoa adierazi dio EAJk eta EH Bilduk estatutu politiko berriaren inguruan lortutako akordioari. Gainera, erabakitzeko eskubidea instituzionalizatzearen beharra azpimarratu du "herri gisa hazten jarraitzeko eta ongizate ekonomiko nahiz soziala bultzatzeko".

Uda osteko lehen gobernu bileraren ostean, Gipuzkoako ahaldun nagusiak urte politiko berriko lehen prentsaurrekoa eskaini du.

Olanoren esanetan, ondo dago EAJk eta EH Bilduk lorturiko akordioa gainerako alderdiei zabaldu nahi izatea, baina, betiere, oinarriei uko egin gabe.

Iñigo Urkullu lehendakariak atzoko elkarrizketan egindako adierazpenez galdetu diote Olanori. Urkulluk esan zuen "ahalik eta adostasun zabalena lortzen" saiatuko dela, eta adostutakoa "hasierako" testua baino ez zela. Olanoren iritzian, "EAJren afiliatu eta militante guztiek oso argi" dute erabakitzeko eskubidearen babesa. "Afiliatu eta militanteok oso argi daukagu zein den gaur egungo egoera politikoaren printzipioa, hau da, etorkizuna erabakitzeko eskubidearen printzipioa", nabarmendu du.

Gainera, horren esanetan, EAJk eta EH Bilduk gizartearen gehiengoa ordezkatzen dute, baina positiboa litzateke, horren ustez, "alderdi politiko gehiagok eta, hortaz, herritar gehiagoren ordezkari gehiagok, printzipio hori babestuko balute". Olanok azpimarratu duenez, euskal herritarren erabakitzeko eskubidea ezin da alde batera utzi, EAJren eta EH Bilduren oinarriek adostutakoa beste batzuek ere onar dezaten.

Abogamos por generar un nuevo modelo de relación con el Estado para seguir avanzando como territorio. Es necesario institucionalizar el #derecho a decidir para seguir creciendo como país e impulsar así un bienestar económico y social. pic.twitter.com/bzZvc7CkSp

— Markel Olano (@markelolano) 4 de septiembre de 2018