Politika
Zentsura-mozioa
Urkulluk 'elkarrizketa etengabea' eta 'akordiorako borondatea' eskaini dio Sanchezi
agentziak | erredakzioa
Lehendakariak ziurtatu duenez, Mariano Rajoyren aurkako zentsura mozioaren alde bozkatzean, EAJk "emandako hitza bete du".
Iñigo Urkullu lehendakariak "elkarrizketa etengabea" eta "akordiorako borondatea" eskaini dio Pedro Sanchezi, "beti mantenduko" duelako "harremana, erantzukizun hori duenarekin".
Urkulluk adierazi duenez, Eusko Jaurlaritza susperraldi ekonomikoa, enplegua sortu eta erakundeen egonkortasunaren "lehentasunekin" konprometituta dago.
Hedabideen aurrean egindako adierazpenetan, lehendakariak ziurtatu du, Mariano Rajoyren aurkako zentsura mozioaren alde bozkatzean, EAJk "emandako hitza bete" duela. Egoera "oso nahasia" dela adierazi du Urkulluk; erabakia "sakonean"pentsatuta hartu dute eta jeltzaleen babesa "PPren gehiengoa bermatzeko ere ez zen nahikoa", erantsi du.
Urkulluren esanetan, "PPren irabazizko auziagatik" emandako Gurtelen epaiak mugarria ezarri du. Hori baino lehen "Estatu espainiarraren egonkortasuna" bilatzea izan zen helburua, Estatuko Aurrekontu Orokorren aldeko botoa emanez, "Euskadirentzat ez ezik, Estatu espainiarrarentzat ere onuragarriak izan zitezen".
Lehendakariak gogorarazi duenez, Gurtelen epaiaren ostean, azalpena berehala emateko eskatu zion Mariano Rajoyri.
Orduan, "zigor-epai hori aztertzeko epea zabaldu zen, beharrezko azalpena emanez, politikarekiko erantzukizunez eta duintasuna emateko konpromisoarekin".
Pedro Sanchez Espainiako Gobernuko presidente berriari dagokionez, Eusko Jaurlaritzarekin izango duen harremanaz emandako hitza mantentzea espero du.
Hala, Urkulluk Pedro Sanchezekin "jesartzea" eskatu du"orain arte zirriborroa izandakoan sakontzeko", horren izendapena "babestu dutenen" aniztasuna ikusita, beharrezkoa izango baita azterketa egitea "erakundeen esparrutik".
