Anna Gabrielen estradizio eskaera baztertuko duela iragarri du Suitzak

Suitzako Gobernuak aurreratu duenez, Anna Gabriel CUPeko diputatu ohiaren kontrako balizko estradizio eskaera errefusatuko du.

Folco Galli Suitzako Justiziako Bulego Federaleko bozeramaileak Le Temps egunkari suitzarrari adierazi dionez, ez du a priori estradizio eskaerarik aginduko, delitu politikoengatik. "Gure Kode Penalaren eta Giza Eskubideen Europako Hitzarmena aintzat hartuta, ezin da arrazoi horregatik estradizio eskaerarik onartu", gaineratu du.

Halaber, Suitzak ez duela oraindik Espainiako agintariek inolako jakinarazpenik jaso azpimarratu du.

Gabrielek atzo jakinarazi zion Llarena epaileari ez zela ikertu gisa gaur deklaratzera joango, eta Suitzan jarraituko zuela. Anna Gabriel Auzitegi Gorenera deklaratzera joan ez dela eta, hura atxilotzeko agindua eman du Pablo Llarena epaileak. Atxilotzeko agindua Estatu espainiarrera mugatu du Gorenak, eta ez du nazioarteko agindurik eman, Fiskaltzak hori ere eskatu duen arren. Epaitegiko iturriek zehaztu dutenez, Estatu espainiarrera itzuliko balitz bakarrik atxilotuko lukete. Hortik kanpora aske mugitu daiteke.