UDEFen hitzetan, Rajoyk PPren 'B kutxatik' kobratu zuen

PPko 'B kutxaren' ikerketan, Alderdi Popularreko buruzagiak, besteak beste, Mariano Rajoy Espainiako Gobernuko presidentea, inplikatzen dituzten oharrak agertzen direla onartu du Manuel Morocho Delitu Ekonomikoen Unitateko (UDEF) buruzagiak.

Bestalde, Gurtel auziaren instrukzioa “ezegonkortzeko” kereilak eta presioak deitoratu ditu Morochok. Gainera, ikerketa judizialetan eraginkortasuna irabazteko “ustelkeriaren aurkako borrokan erakunde zentral” bat faltan botatzen duela onartu du poliziak.

PPren legez kanpoko finantziazioa argitzeko Diputatuen Kongresuko ikerketa batzordean agerraldia egin du Morochok. Gurtel auziaren markoan, UDEFen ikerketarekin pozik ez zeudelako Alderdi Popularreko agintariek bere aurka jarritako zazpi kereilak gogorarazi ditu poliziak.

Poliziaren ustez, Espainiak nazioarteko erakundeen gomendioei jaramon egin beharko lieke eta bulego zentral bat sortu “agentzia ezberdinak bertan biltzeko”, erakunde judizialei babesa emateko. Horrela, epeak murriztu eta alde “konplexuenetan” sakontzea posible izango litzatekeela ziurtatu du.

Erakunde horrek aurrekontu bat, giza baliabideak eta “independentzia” beharko lituzkeela azpimarratu du. Bestalde, Gurteleko auzipetuen salaketa guztiak artxibatu zituztela gogorarazi du Morochok. “Helburua oso argia zen”, adierazi du, “ikerketa ezegonkortu”.