%13,07ko parte-hartzea, A5eko Gure Esku Dagoren galdeketetan

21.027 pertsonek eman dute botoa igande honetan Gure Esku Dago erabakitzeko eskubidearen alde antolatutako galdeketetan. 09:00etatik 20:00etara egin dute deialdia 13 herritan. Bozkatzera deituta zeudenetatik % 13,07k eman dute botoa.

Plataformak jakinarazi duenez, Bizkaiko eta Gipuzkoako 13 herritan bizi diren 16 urtetik gorako 160.853 biztanlek zuten bozkatzeko aukera, "Euskal estatu bateko hiritar" izan nahi duten ala ez erabakitzeko.

Andoain, Areatza, Atxondo, Beizama, Berango, Erandio, Elantxobe, Galdakao, Getxo, Mundaka, Ibarrangelu, Leioa eta Otxandio herrietan antolatu dituzte galdeketak.

Azkenik, 21.027 pertsona hurbildu dira hautetsontzietara, erroldaren % 13,07. Erandion, adibidez, parte-hartzea % 10,05koa izan da; Ibarrangelun, berriz, % 57,74.

Gure Esku Dagok jakinarazi duenez, 22:00etatik aurrera behin-betiko emaitzak jakinaraziko dituzte.

Galdeketen emaitzari dagokionez, erabakitzeko eskubidearen eta euskal estatu independentearen alde agertu dira parte-hartzaileen % 95,22.

Parte-hartzeari dagokionez, honako hauek dira datuak, herriz herri:

.#A5galdeketak Parte hartzea | Participación pic.twitter.com/fPcxEU3YgT

? Gure Esku Dago (@GureEskuDago) 5 de noviembre de 2017

Galdeketa-eguna 09:00etan hasi da, eta une berezia bizi izan dute hautesleku nagusiak zabaltzerako orduan; izan ere, Kataluniako hautetsontzi bana iritsi da herri bakoitzera (urriaren 1eko erreferendumean erabilitakoak), eta ondoren, adierazpena irakurri dute herriz herri.

Emakumeak izan dira lehenak botoa ematen herri guztietan, 1933an gaurko egunez lehen aldiz botoa eman zuten emakumeei omenaldi sinbolikoa eginez.

Kataluniako hautetsontzia Andoainera iritsi den unea #geukerabaki #A5galdeketak @GureEskuDago pic.twitter.com/PSpeY6IsZ6

? Beñat Sarasola (@Sarasola_b) 5 de noviembre de 2017

Gure Esku Dago plataformak jakitera eman duenez, 17:30 arte 17.814 lagunek eman dute botoa, deitutakoen %11,55ak. Hala, Getxon, udalerririk handienean, 6.703 pertsonak eman dute botoa goizean zehar (%9,84%). Portzentajea oso ezberdina da herriz herri begiratuz gero: %7,79 Leioan, adibidez, eta %54,01 Ibarrangelun.

[17:30] Parte hartzea | Participación #A5galdeketak pic.twitter.com/nkouGalpQd

? Gure Esku Dago (@GureEskuDago) 5 de noviembre de 2017

EAJ eta EH Bilduko kargu eta buruzagi politikoek parte hartu dute, besteak beste, galdeketetan. Adibidez: Ibon Uribe eta Joseba Goikuria Galdakao eta Erandioko alkateak (EAJ), Ane Carrera Andoaingo alkatea (EH Bildu), Koldo Mediavilla EBBko arduradun instituzionala, Laura Mintegi EH Bilduko parlamentari ohia eta Iñaki Zarraoa Getxoko alkate jeltzale izandakoa.

Manifestua

"Euskal Herrian erabakia gauza dadin gure eskuetan dagoen guztia egingo genuela esan genuen. Euskal Herrian erabakia gauza dadin, gure herrian erabakia gauzatzera goaz, hautetsontziak kalera atera eta herritarren esku jarriz. Berme guztiekin. Normaltasunez. Martxan dira herri galdeketak Andoain, Areatza, Atxondo, Beizama, Berango, Erandio, Elantxobe, Galdakao, Getxo, Mundaka, Ibarrangelu, Leioa eta Otxandion", adierazi du Gure Esku Dago ekimenak ohar batean.

"Harro gaude, muga asko gainditu ditugulako bidean. Pausoak eman ahala ikusi dugu ezinezkoa zirudien hori posible dela, ezina ekinez egiten dela. Banatzen gintuzten hormak eta harresiak gainditzeko gai garela, adostasunak josteko gaitasuna dugula, elkarrekin gauza handiak egin ditzakegula eta herritarron borondateak mugarik ez duela. Erabakitzeko eskubidearen defentsak elkartzen gaitu, demokraziak berak", nabarmendu dute.

"Kataluniatik datozkigun berri txarrei erantzuteko ere baliatu nahi ditugu gaurko herri galdeketak. Herritar zoriontsuak, botopaperak eta hautetsontziak erakutsiko dizkiogu neurri autoritarioen bidez ideien aurkako eta demokrazia bateko oinarrizko printzipioen kontrako jazarpena egiten ari den estatu espainiarrari. Euskal Herrian ere milaka herritar ahaldundu eta nekaezin baikaude, demokraziaren eta erabakitzeko eskubidearen alde lanean. Horregatik, gaurko egunean Kataluniako herriari egin diezaiokegun ekarpenik handiena da gure eskubide zibil eta politikoak egikaritu eta hautetsontziak botoz betetzea" gogoratu dute, atzo Bilbon, 155. artikulua gaitzesteko eta Kataluniako Gobernuaren atxilotzea gaitzesteko manifestazioa bultzatu eta 24 ordu baino gutxiagora.

Herritar guztiei parte hartzeko dei egin diete: "Hautetsontziak zabaldu berri ditugu eta auzokideei guztiei dei egiten dizuegu, boto papera eskuan, demokraziaren ariketa honetara etor zaitezten. Bai, Ez edo zuriz bozkatu, baina bozkatu. Zuen botoa garrantzitsua da".

Guztira, aipaturiko 13 udalerri horietan erroldatuta dauden 16 urtetik gorako 160.853 biztanlek eman ahal izan dute botoa.

Aurreko urteko ekainaren 5ean galdeketen tsunami bat iragarri zuen Gure Esku Dagok eta ekimenak emandako datuen arabera, dagoenek 167 herri busti ditu olatuak. Guztira, 154.500 herritarrek hartu dute parte azken urteotan Euskal Herrian egin diren herri galdeketetan.