Euskal presoentzat amnistia aldarrikatu du ATAk Donostian

200 pertsonak hartu dute parte gaur Amnistiaren aldeko eta Errepresioaren aurkako ATA mugimenduak deitutako manifestazioan, Donostian, Kontxako Banderaren estropadaren egun berean antolatu duten mobilizazioan. Antolatzaileek bertan adierazi dutenez, "ATAk ez ditu bakarrik utziko erresistentzia eta borroka jarrera erakusten duten errepresaliatu politikoak".

Mobilizazioa 13:15ean hasi da, 'Antolakuntza eta borroka amnistia osoa' lelopean. Irakurri duten agirian adierazi dutenez, "Euskadin ezingo da bakeaz hitz egin, ehunka euskal militante iraultzailek kartzelan edo ihes eginda jarraitzen duten bitartean". Halaber, "elkarbizitzarik ere ez da egongo, baldin eta euskal gazte borrokalariak manifestazio batean parte hartzeagatik edo polizia muntaia baten ondorioz espetxean sartzen jarraitzen badute", gaineratu dute.