Referendumean ez parte hartzera deitu dute Catalunya en Comuko 214 kidek

Urriaren 1ean Katalunian izango den referendumean parte hartzeari uko egin diote Catalunya en Comu koalizioko 214 kidek manifestu baten bidez, haien aburuz, referendumak "legezkotasunik eta legaltasunik ez duelako".

Sinatzaileen artean, Eulalia Vintro, Jose Luis Lopez Bulla edo Joan Boada ICVko buruzagi historikoak daude.

Ekainaren azken astean adostutako eta joan den uztailaren 8ko batzarrean eztabaidatutako dokumentua sinatu dute. 'Urriaren 1ean ez goaz' du izenburuz, baina azkenean ez zen batzar hartan bozkatu, adostutako dokumentu ofizialean jasota zeudelako "ideia nagusiak".

Podem en Barcelonako buruzagi Marc Bertomeuren iritziz, urriaren 1erako Kataluniako Gobernuak iragarri duen galdeketak "ez du legaltasunik, ezta legezkotasunik ere, ez baitu gehiengoa ordezkatzen".

Agiri horren sinatzaileen aburuz, urriaren 1eko galdeketa "ezin da emaitza lotesleko referenduma izan, Junts pel Siko eta CUPeko jarraitzaileentzat egindako aldebakarreko proposamena baita".