Ertzaintza eta euskal gizartea iraintzea egotzi dio Urkulluk Otegiri

Iñigo Urkullu lehendakariaren hitzetan, Arnaldo Otegik esandako adierazpenek "Ertzaintza eta euskal gizarte osoa iraintzen dute". Euskadin "Guardia Zibilak, Espainiako Poliziak eta Ertzaintzak hil egin" dutela adierazi zuen Sortuko idazkari nagusiak.

Hitz horien harira, Urkulluk artikulua zabaldu du sare sozialetan, eta bertan deitoratu duenez, "etika eta elkarbizitza normalizatuaren alorrean, ematen du ezker abertzaleak aurrera pauso bat ematen duela eta bi atzera".

"Lehendakaria naizen heinean, Arnaldo Otegiren hitzak iraintzat jotzen ditut. Ertzaintzari eta euskal gizarte osoari egindako iraina, alegia, eta elkarbizitza normalizatuaren eta terrorismoaren biktimen alde emandako urrats guztien aurka", gaineratu du Urkulluk.

Lehendakariaren aburuz, "Otegik errealitatean kokatu behar du bere burua, eta besteei egindako edozein eskari onartezina da".