Bilkura jendetsua Altsasun, guardia zibilei egindako erasoa ukatzeko

Bilkura jendetsua egin dute larunbat goizean Altsasun, bi guardia zibili egindako erasoaren "bertsio ofiziala" ukatzeko. "Muntaia mediatikoa eta politikoa" izan dela salatzeaz gain, "gazteen aurka ez ezik, herri osoaren kontra" egin dutela adierazi dute.

Manifestazioa Altsasuko Foruen enparantzatik abiatu da, momotxorroen (herriko inauterietako pertsonaia ezagunak) talde baten atzetik. 'Muntai polizialik ez. Utzi pakean Altsatsu' zioten kartelak eraman dituzte.

Horrez gain, 'Asesinos a sueldo, abuso de poder' (soldatapeko hiltzaileak, botere neurrigabea), 'Ni se os quiere ni se os necesita' (ez zaituztegu nahi eta behar) edo 'Televisión manipulación' (Telebista manipulazioa) aldarriak oihukatu dituzte. Herriko zenbait kaletan ibili eta gero, plazara itzuli dira, agiri bat irakurtzeko.

Hasi baino minutu batzuk lehenago, COVITEko (Terrorismoaren Biktimen Elkarteko) lau kide izan dira plazan, Consuelo Ordoñez presidentea tartean zela. 'Odio fuera' (gorrotoa kanpora), 'Los que sobran son los violentos' (soberan daudenak biolentoak dira), eta 'Guardia Civil, seguid aquí' (guardia zibila, jarraitu hemen) esaldiak zituzten kartelak erakutsiz.