EAJ: 'PP-C's-en arteko itunak autogobernuaren porrota ekarriko luke'

Josu Erkoreka EAJren Eusko Legebiltzarrerako Bizkaiko zerrendaburuak gaur ohartarazi duenez, PP eta Ciudadanos alderdien artean egon daitekeen balizko gobernu-akordioa "behin betiko porrota" ekar diezaioke euskal autogobernuari.

Erkoreka arduratuta agertu da Madrilen "PP eta Ciudadanos bilduko lituzkeen gobernu-proiektu bat eratzen hasi dela dirudielako".

"PPren gehiengo absolutuaren esperientzia oso negatiboa izan bada bai autogobernuarentzat, bai euskal bizikidetza- eta gizarte-ereduarentzat, Ciudadanos horretara gehitzeak behin betiko porrota ekar liezaioke gure autogobernuari, eta hori oso arduratzekoa da".

Bere aburuz, bat egingo lukete "dagoeneko euskal autogobernuaren erabat kontrakoa den jarrera erakusten dabilen interesak eta Kontzertu Ekonomikoa desagertzearen eta euskal foruen tradizioa ezabatzearen aldeko obsesioak plazaratzen dituztenen interesak".

Erkorekak herritarrei eskatu die autogobernuaren aurkako "mehatxu" horren jakitun egon daitezela, eta, baieztatu duenez, "EAJ erasoen aurka gaindi ezin daitekeen hesia da".

"Erantzukizuna besterentzeko ahaleginak egin arren, PSOEri dagokio erabakia, inbestidura gauza dadin beharrezkoak diren eserlekuak baititu, eta azken urteetan PPrekin akordio estrategiko ugari sinatu dituena baita", zehaztu du.