IUko oinarriek ontzat eman dute Podemosekin akordioa egitea

Izquierda Unida alderdiak bere oinarriei galdetu die Hauteskunde Orokorretara Podemosekin batera joan nahi duten ala ez. Galdeketaren emaitza Twitter bidez jakinarazi du IUk: parte-hartzaileen % 84,5 alderdi morearekin akordioa erdiestearen alde agertu dira.

Resultado #ConsultaIU:
Votos emitidos: 20.067
Sí: 84,5% (16.953)
No: 13,1% (2.623)
Abs: 2,4% (491)

— Izquierda Unida (@iunida) 5 de mayo de 2016

20.067 lagunek hartu dute parte IUren kontsultan: 16.953 boto-emaile (% 84,5) hauteskundeetara Podemosekin batera aurkeztearen alde agertu dira, 2.623 (% 13,1), kontra, eta 491 (% 2,4), berriz, abstenitu egin dira.

Honako galderari erantzun diote galdeketan parte hartu dutenek: "Ontzat ematen al duzu Podemosekin edota beste alderdi batzuekin ekainaren 26rako hauteskundeetara koalizioan joatea?".

Gehiengo zabalaren babesa lortuta, Alberto Garzon IUko buruak Podemosekin negoziatzen hasteko bidea zabalik du.

Oraindik, balizko koalizioaren inguruan ia dena dago adosteko; izena, gutxienekoen programa eta zerrendak, besteak beste.