Kongresuaren eraketaren berri eman dio Lopezek Espainiako erregeari

Patxi Lopez Espainiako Kongresuko presidente izendatu berriak Felipe VI. erregeari modu ofizialen eman dio Behe Ganberaren eraketaren berri.

Zarzuela jauregian hartu du erregeak buruzagi sozialista; bertaratu diren hedabideen aurrean agurtu dute elkar, eta ondoren, Felipe VI.ren bulegoan egin dute bilera.

Ordubete inguru iraun duen bileraren ondotik, Pio Garcia-Escudero Senatuko mahaiko presidentea ere gaur hartu du erregeak, eta horrek Goi Ganberaren eraketaren berri eman dio.

Behin bilera horiek amaituta, Kongresuan ordezkaritza duten talde politiko guztiekin bilera-erronda abiatuko du erregeak, eta jarraian, Espainiako Presidente izateko hautagaia izendatuko du, Konstituzioaren 99. artikuluan jasotzen dena betez.

Atzo izendatu zuten Lopez Kongresuko presidente, bigarren bozketan, PSOEren eta Ciudadanosen babesari esker. Erregearekin bildu ostean ez du adierazpenik egingo hedabideen aurrean.