'Borroka armatu gabe dena da posible', esan dute ETAko kide batzuek

2010ean Frantziako polizia bat hiltzea leporatuta Parisen epaitzen ari diren ETAko kideek esan dute, ETAk borroka armatua utzi eta lau urtera, Frantziako eta Espainiako agintariek jarrera "arduragabearekin eta ulertezinarekin" jokatzen dutela.

"Gatazka politikoaren sustraietara jo beharrean, betikotzen saiatzen ari dira", adierazi du Arkaitz Agirregabiriak, Parisko Gai Penaletarako Auzitegian sei akusatuen izenean adierazi duenez.

Agirregabiriak berretsi du ETAk indarkeria uzteko erabakiari eusten diola. "Lau urte hauetan gauza asko ikasi dugu. Borroka armaturik gabe dena zela posible zioten. Ez da gezurra. Dena da posible", aldarrikatu du.

Horren hitzetan, "batzuentzat helburua etekinak ateratzea da, pertsonak zapalduta eta esplotatuta", baina haientzat "ametsa herritar librez osatutako Euskal Herri librea lortzea da".

Bestalde, EPPK eta ezker abertzalea "apurtzeko saioak" daudela salatu du. Ezker abertzalearen ildoarekin ados ez dauden hainbat militantek egin ei dute saiakera.

Akusatuei hitz egiteko emandako azken txandan (Auzitegiak gaur bertan emango du ebazpena), Agirregabiria izan da hitz egin duen bakarra, baina guztien izenean hitz egin du.

Biziarteko kartzela-zigorra

Fiskaltzak biziarteko kartzela-zigorra eskatu du Mikel Carrera Saroberentzat, Jean-Serge Nerin Frantziako poliziari tiro egin eta hura hil zuten kideetako bat izan zelakoan.

Bestalde, Ministerio Publikoak 30 urteko zigorra eskatu du Agirregabiriarentzat, hierarkiarengatik, bera izan zelakoan agenteen kontra tiro egiteko agindua eman zuena Carrera iritsi aurretik.

Era berean, 25 urteko zigorra eskatu du Joseba Fernandez Aspurzentzat eta Josu Urbieta Alcortarentzat, tiroketan parte hartzeagatik.

Izaskun Lesakari eta Xabier Goienetxeari, berriz, 18 urteko kartzela-zigorra ezartzeko eskatu du, tiroketa gertatu aurreko lapurretan parte hartzea egotzita.