EAJk dio Euskadiko PPn Rajoyren hauteskunde-interesa gailentzen dela

Araba Buru Batzarreko presidente Xabier Agirrek gaur adierazi duenez, "Arantza Quirogaren kargu uzteak frogatu egiten du "Euskadiko PP alderdian Rajoyren hauteskunde-interesa nagusitzen dela Moncloan bere egonaldia errepikatzeko, Euskadiko bake eta bizikidetza prozesuan aurrerapenak ematea bideratuko duen edozein norabide aldaketa baino".

Abenduaren 20ko hauteskundeei begira bere alderdiak Arabatik Kongresura eta Senatura aurkeztuko dituen hautagaien aurkezpen-ekitaldian parte hartu du Agirrek, Gasteizen. Zerrenda horien buru Mikel Legarda eta Almudena Otaola egongo dira, hurrenez hurren.

Gaur egin duen mintzaldian zehar, Arabako jeltzaleen buruak defendatu duenez, hauteskunde orokor hauek oinarrizkoak dira, zere "EAJ Arabako eta Euskadiko benetako ahotsa da Madrilen".

Datorren legegintzaldian landu daitezkeen kontuen artean konstituzioaren erreforma, hauteskunde-legearen aldaketa edota Kontzertu Ekonomikoaren gainbegiraketa egon daitezkeela azpimarratu ostean, Agirrek "tutoretzapean dauden ordezkariak izatea" leporatu dio Euskadiko PPri, "beste interes batzuen aurrean men egitera behartuta daudenak, nahiz eta gurea, hemengoa, kaltetu".

Agirrerentzat Alfonso Alonso, Javier Maroto eta Iñaki Oyarzabal kameleoian pare jarduten dute, "hemen euren azala arabazale eta gasteizale gisa tindatzen baitute, eta han bertako ingurunearekin mimetizatzen dira, eta hemengoei isiltzeko agintzen diete". "Galde diezaiotela bestela Euskadiko PPko lehendakari ohi Arantza Quirogari!", kritikatu du.