Ortegak dio ez zuela agindurik desobeditu Kataluniako kontsultagatik

Joana Ortega Kataluniako presidenteorde ohiak esan du Azaroaren 9ko kontsulta herritarren ardurapean zegoela Auzitegi Konstituzionalak debekua ezarri zuenean eta, beraz, ez duela uste inolako desobedientzia deliturik egin zuenik, galdeketaren emaitzen berri emateko agerraldia egiteagatik.

Ortegak Kataluniako Justizia Auzitegi Nagusian deklaratu du arratsalde honetan, A9ko kontsultaren antolakuntzan parte hartu zuela egotzita. Fiskaltzak desobedientzia, dirua bidegabe erabiltzea, prebarikazioa eta funtzioen usurpazioa egozten dizkio.

?Ez dut Auzitegi Konstituzionalak esandakorik desobeditu, ez dut agindu bidegaberik eman eta ez dut inolako irregulartasun ekonomikorik egin?, azpimarratu du.

Auzitegian azalpenak eman ostean, kazetarien aurrean adierazpenak egin ditu. Lasai dagoela esan du, beti  ?errespetuz? eta ?legearen baitan? jardun duelako.

Prozesu judiziala kritikatu du. ?Ez da ona ekitaldi politiko, baketsu eta demokratiko bat kriminalizatzea; horrelako gaiak elkarrizketaren adostasunaren eta akordiorako borondatearen bitartez konpondu behar dira?, erantsi du.

Ortegak ez ditu Fiskaltzaren galderak erantzun, baina epailearen aurrean gogora ekarri du Auzitegi Konstituzionalak dekretu bidez deitutako lehendabiziko kontsulta debekatu zuenean, Generalitateak A9arekin lotutako ekimen guztiak geldiarazi zituela.

Dekretu bidez kontsulta horren lekua prozesu parte-hartzaile batek hartu zuen eta galdeketa hori debekatu egin zuten, azaroaren 4an publikatutako probidentzia baten bidez.

Alabaina, Ortegak zehaztu du ordurako galdeketa alternatiboa prest zegoela, boluntario guztiek eginkizunak esleituta zituztela eta, beraz, berak ezin zuela ezer geldiarazi.

Agentziek iturri judizialak aipatuta zabaldu dutenez, 2014ko irailaren 30etik aurrera dekretu bidez deitutako kontsulta eta galdeketarekin lotutako espediente ekonomiko guztiak bertan behera utzi zituela Kataluniako Gobernuak, Konstituzionalaren debekuaren ondorioz.

Herritarrek antolatutako kontsulta alternatiboa Kataluniako Gobernuaren kontrol eta ikuskaritzarik gabe eta hauteskunde-errolda ofizialik gauzatu zela nabarmendu du.

Kontsulta egin ahal izateko azpiegitura jartzearen erantzukizuna bere gain hartu du eta galdeketaren emaitzen berri emateko agerraldia egin izanagatik bere burua defendatu du: ?Gertakari garrantzitsua izan zen, historikoki, soziologikoki eta politikoki eta, ondorioz, herritarrak informatu behar nituen?.

Irene Rigau: 'Kataluniako Parlamentuaren agindua bete nuen'

Irene Rigau Kataluniako Hezkuntza kontseilariak inputatu gisa deklaratu du gaur Kataluniako Justizia Auzitegi Nagusiko arlo zibileko eta zigor-arloko salan 2014ko azaroaren 9an independentziaren inguruko galdeketa antolatzea egotzita.

Ordubetez aritu da Rigau. Joan Manel Abril epaileak eta defentsak egindako galderei erantzun die jardunean dagoen kontseilariak. Fiskaltzak eta herri akusazioek itaundutakoei, ordea, ez die erantzun.

Deklarazioaren ostean kazetarien aurrean egindako adierazpenetan agertu duenez, "lasai" dago, ondo jokatu zuela sinistuta, izan ere, Kataluniako Parlamentuak "emandako agindua bete" baino ez zuen egin azaroaren 9ko prozesu parte hartzailea antolatuta.

Fiskaltzaren galderei erantzun ez diela eta, arrazoia azaldu du Rigauk: "Hasiera batean ez zuen delitu zantzurik atzeman. Baina gerora, irizpidea aldatu zuen", salatu du.

"Kataluniako Parlamentuaren agindua bete nuen. Nire Parlamentua da", nabarmendu du. Egun hartan eduki zuen egitekoaz galdetuta, ikastetxeetako zuzendariei hauteslekuak zabaltzeko agindurik eman ez ziela argitu du, lekua utz zezaketela bakarrik iradoki zieten.

Goizean heldu da Rigau justizia jauregira, Kataluniako Gobernuaren ordezkaritza zabala ondoan zuela eta independentziaren aldeko ehunka lagunen babespean.

Artur Mas Generalitateko presidenteak ostegunean deklaratuko du.

A9ko galdeketaren kontrako kereilak 2014 amaieran onartu zituen tramitera Kataluniako Auzitegi Nagusiak, baina irailaren 29ra arte, Katalunian irailaren 27an hauteskundeak egin eta bi egunera, ez dituzte Generalitateko hiru buruzagi hauek inputatu gisa deklaratzera deitu.

Hilabete hauetan, hainbat izapide egin ditu Auzitegiak. Besteak beste, hautesleku izan ziren ikastetxe batzuetako zuzendariak galdekatu eta kontsultaren boto-paperak eta barne komunikazioak aztertu ditu eta dokumentazioa eskatu du.

Akusazioa

"Konstituzioaren interprete nagusia denak emandako ebazpen bat behar bezala betetzeari muzin egitea" egotzi die Fiskaltzak Masi, Ortegari eta Rigauri. Auzitegi Konstituzionalak emandako agindua gorabehera, prozesu parte-hartzailea antolatu eta bultzatu zuten.

Fiskaltzaren aburuz, aurrena antolatu zuten kontsulta eta gero kontsulta ordezkatu zuen prozesu parte-hartzailea, biak utzi zituen bertan behera Auzitegi Konstituzionalak, eta horren jakitun izan arren, berdin-berdin antolatu zuten galdeketa. Artur Mas Kataluniako presidenteak ordukoan egindako adierazpen batzuk jaso ditu Fiskatzak, proba gisa: "Fiskaltzak hauteslekuak zabaltzearen arduraduna nor den jakin nahi badu, ni naiz erantzulea, ni eta nire gobernua".

Fiskaltzak nabarmendu duenez, ez da beharrekoa Generalitateak Auzitegi Konstituzionalaren erabakia ez betetzeko erabakia berariaz adierazi izana, "nahikoa da borondateari erreparatzea, jarrera aktibo edota arduragabe edo adierazi gabekoa erakustea".

Fiskaltzaren arabera, Kataluniako Gobernuak "antolatutako, babestutako eta ordaindutako kontsulta" izan zen. Konstituzionalaren ebazpena argia zen, eta, hala ere, hiru inputatuak modu pertsonalean eta zuzenean aritu ziren galdeketa sustatzen eta babesten.

Rigauren eta Ortegaren aldeko elkarretaratzea

ANC, Omnium, AMI eta ACM independentziaren aldeko elkarteek kontzentrazioa egin dute Kataluniako Justizia jauregiaren aurrean, bi inputatuei babesa emateko eta "demokraziaren kontrako erasoa" salatzeko. Masek deklaratzen duenean ere, beste elkarretaratze bat egingo dute taldeok.

(Esteladak eta independentziaren aldeko kartelak ikusi ahal izan dira elkarretaratzean. Argazkia: EFE)

Auzitegiak kritikatu egin ditu manifestazioak

Bestalde, auzitegiak "eraso"tzat jo ditu egoitza judizialaren aurrean deitutako elkarretaratzeak.

Agiri batean, TSJCren gobernu aretoak salatu du manifestazioak "eraso zuzena" direla "independentzia judizialaren aurka", eta "are onartezinagoak" direla kargudun publikoek deitu dituztela kontuan hartuta.

Epaileen  esanetan, "interes politikoa du justizia auzitegien jokaera modu interesatuan zalantzan jartzeak, eta presio estrategiak abiatzea bizikidetza politikoa ukatzea da".