Asiron, German Rodriguezen omenaldian parte hartuko duen lehen alkatea

Joseba Asiron Iruñeko alkateak baieztatu du German Rodriguez oroitzeko ekitaldietan izango dela Udalaren ordezkari gisa. Rodriguez 1978ko sanferminetan poliziaren tiroen ondorioz hil zuten.

"Bada garaia Iruñeko Udala eta alkatea ekitaldi horretan egoteko, aurrekanpainan eta kanpainan konponketari, oroimenari eta memoriari buruz esandakoak betetze aldera", adierazi du Asironek sari batzuen banaketaren aurretik.

Omenaldia jaien egitarau ofizialean sartzeko aukeraz galdetuta (78 Gogoan Herri Ekimenak eskatu bezala), alkateak esan du hori “bigarren mailako proposamena” dela, eta “oraindik” ez dutela aztertu.

“Gainerako taldeekin hitz egingo dugu, eta dagokionean hartuko dugu erabakia. Oraingoz esan dezakedana da Udalaren ordezkaritza bat egongo dela omenaldian, eta Joseba Asiron bertan izango dela”, azpimarratu du.