'Apaltasun handiagoa' eskatu dio Pablo Iglesiasek Pedro Sanchezi

Pablo Iglesias Podemoseko idazkari nagusiak mezua helarazi dio gaur Pablo Sanchez PSOEko buruzagiari, eta atzo sozialistek Batzorde Federalean adierazitako "euforia" hoztu du Iglesiasek.

"Apaltasun handiagoa, Pedro", esan dio lider sozialistari, "1979. urteaz geroztik izandako hauteskunde-emaitzarik txarrena izan duzue eta".

Iglesias Toledon izan da, Gaztela-Mantxako Egunean, Podemoseko ekitaldiaren itxieran.

"Zalantzarik ez izan: PP gelditu nahi dugu, eta erakundeetatik kanporatu, baina gurekin akordioak lotu nahi dituenak, Pedro, bira eman behar du. Ez da nahikoa esatea PSOEk biraketa egingo duela: PSOEk bira ematen ez badu, ez da akordiorik izango", esan dio Iglesiasek Sanchezi. Halaber, "lasaitasuna eta leuntasuna" eskatu dizkio.

Bestalde, "AEBko Gobernuarekin egindako merkataritza-akordioarekin PSOE bat datorrela ikustea ez zaigu gustatzen", adierazi du. "Horrela ez, Pedro, hori ez baita bira ematea: horrek dakar PPk bezala gauzak egiten jarraitzea", ohartarazi du.

Iglesiasek azpimarratu duenez, herritarrek aldaketa nahi dute, ez akordioa. Horren harira, Podemosekin ituna lotzeko hiru elementu nagusiak izendatu ditu: herritarren protagonismoa nabarmentzea, ustelkeriarekin tolerantziarik ez izatea, eta kargurik ez duela nahi "PSOE buru duen gobernuetan ez baikara sartuko".